ПРОЕКТ СЛОБОДА ЗАПРЕН ВО ПОСЛЕДЕН МОМЕНТ – Трамп најави голема дипломатска игра

Претседателот на САД, Доналд Трамп, објави дека привремено ја паузира американската операција за придружба на трговски бродови низ Ормутскиот теснец, оставајќи простор за можен договор со Иран.

Операцијата „Проект Слобода“, која започна на почетокот на неделата со цел обезбедување безбеден премин низ еден од најважните светски нафтени коридори, е ставена во мирување поради „значаен напредок“ во преговорите, пренесе CBS.

Во објава на социјалната мрежа Truth Social, Трамп наведе дека одлуката е донесена по барање на Пакистан и други држави, како и поради напредокот во разговорите со иранските претставници. Тој нагласи дека, иако операцијата е паузирана, американската блокада врз иранските пристаништа останува на сила.

За време на акцијата, американските сили придружуваа бродови низ теснецот и расчистуваа морски мини, додека биле воспоставени контакти со десетици пловила за безбедно поминување.

Истовремено, беа регистрирани повеќе инциденти на море и американски воени бродови биле цел на напади со ракети, дронови и брзи чамци, но без последици, според официјални извори.

Командантот на Централната команда на САД, адмирал Бред Купер, изјави дека американските сили возвратиле со уништување на неколку ирански пловила, тврдење што Техеран го негира.

Во меѓувреме, пријавени се и напади врз трговски бродови на други земји во регионот, вклучително и инциденти поврзани со Обединетите Арапски Емирати.

Иранскиот министер за надворешни работи, Абас Аракчи, предупреди дека ваквите воени активности може да ги загрозат преговорите, нагласувајќи дека „нема воено решение за политичката криза“.