ПРАКТИЧНО ИМАМЕ НОВ АЕРОДРОМ По 56 години, охридскиот „Свети апостол Павле“ доби нов лик

Денеска свечено беше пуштен во употреба реконструираниот аеродром, чија обнова започна во март годинава со цел унапредување на условите и подобрување на искуството за патниците.

На свеченото отворање, вицепремиерот и министер за транспорт Александар Николоски истакна дека со завршувањето на реконструкцијата, Охрид практично добива нов аеродром, со целосно обновена терминална зграда и помошни простории.

„Практично имаме нов аеродром“, истакна Николоски.

Тој посочува дека инвестицијата е значаен чекор за развојот на охридскиот регион и воздушниот сообраќај.

Во исто време, охридскиот аеродром бележи рекордна година. Од почетокот на 2026 година досега, низ аеродромот поминале повеќе од 240 илјади патници, а очекувањата се дека вкупниот број патници на двата македонски аеродроми годинава ќе достигне околу четири милиони.

Посебен акцент при реконструкцијата е ставен на препознатливиот охридски идентитет. Во внатрешноста на терминалната зграда се поставени реплики на мозаици од стариот дел на Охрид, мотиви од Варош и Плаошник, како и реплики на фрески од катедралната црква „Света Софија“. На тој начин, дел од богатото културно наследство на градот е вградено во современиот изглед на аеродромот.

Николоски посочи дека паралелно со реконструкцијата на аеродромот се реализираат и инфраструктурни проекти во регионот, со цел да се создаде функционална целина и подобра поврзаност.

Тој нагласи дека од Охрид до аеродромот веќе може да се стигне по новиот автопат, а најави и отворање на преостанатата, најтешка делница во наредните месеци.

Според Николоски, очекувањата се целиот автопат да биде пуштен во употреба во текот на првото полугодие од следната година.