ДРАМА ДО ПОСЛЕДНА СЕКУНДА – Македонија со гол во финишот го урна Бразил

Македонската женска ракометна репрезентација обезбеди пласман во полуфиналето на Светското училишно првенство што се одржува во Скопје, откако во драматичен четвртфинален натпревар ја совлада селекцијата на Бразил со 19-18.

Средбата беше исклучително неизвесна од почеток до крај. Нашите ракометарки на полувреме имаа минимална предност од 11-10, која успеаја да ја задржат и во вториот дел, покажувајќи смиреност и борбеност во клучните моменти.

Најефикасни во македонскиот состав беа Ања Лашкоска со пет постигнати голови и Ивана Трифуноска со четири.

Со оваа победа, Македонија го продолжува совршениот учинок на првенството, откако во групната фаза оствари убедливи триумфи над Белгија, Грузија и Словачка.