13 МИЛИЈАРДИ ЕВРА СЕ ВО ИГРА Една земја може да го блокира новиот данок на ЕУ
Брисел сака 1,9 милијарди евра годишно од онлајн обложувањето, но Малта најавува отпор и се заканува дека ќе го искористи правото на вето.
Европската унија се соочува со нов политички судир поради предлогот за воведување данок од 3 проценти на нето-прометот на индустријата за онлајн обложување. Европската комисија проценува дека мерката би можела да носи околу 1,9 милијарди евра годишно, односно повеќе од 13 милијарди евра во седумгодишна буџетска рамка.
Брисел сака со овие средства да ги финансира зголемените трошоци за одбрана и отплатата на европскиот заем за закрепнување по пандемијата, без дополнително зголемување на директните придонеси од земјите членки.
Но, предлогот наидува на жесток отпор во Малта, каде индустријата за игри на среќа има значително учество во економијата. Премиерот Роберт Абела порача дека Валета нема да прифати нов данок на ниво на ЕУ за финансирање на европската потрошувачка.
Малтешките власти предупредуваат дека повисокото оданочување може да ги натера компаниите да го напуштат европскиот пазар и да ги насочи играчите кон нелегални платформи.
Во спротивниот табор е легендарниот англиски голман Петер Шилтон, кој денес се залага за построга регулација на коцкањето. Тој смета дека повисокиот данок би ги намалил рекламните буџети на обложувалниците, а со тоа и нивната можност да привлекуваат нови, особено млади, играчи.
Малта не е единствената земја што се спротивставува. Италија, Шпанија и Португалија исто така имаат резерви. Шпанија, според проценките, би била најголем губитник со околу 414 милиони евра годишно, додека за Малта сумата би изнесувала околу 165 милиони евра.
Најголемиот проблем за Брисел е што за воведување нови сопствени извори на приходи на ЕУ е потребна едногласна согласност од сите 27 членки. Тоа значи дека доколку Малта и нејзините сојузници останат на ставот дека ќе стават вето, планот за нов европски данок може да биде блокиран уште пред да влезе во формална процедура.
