ЗАСЕКОГАШ ГО ПРОМЕНИ СКОПЈЕ – 63 години од катастрофалниот земјотрес
Државниот архив со ретроспектива потсети на трагичниот ден кога Скопје беше погодено од катастрофалниот земјотрес и на солидарноста што следеше од целиот свет.
На денешен ден пред 63 години, Скопје беше погодено од еден од најразорните земјотреси во својата историја. Катастрофата што се случи на 26 јули 1963 година засекогаш го промени ликот на градот и остави длабока трага во животите на неговите жители.
Во 5:17 часот, силниот земјотрес за само неколку секунди уништи домови, улици и цели населби. Илјадници семејства останаа без покрив над главата, а бројни човечки животи беа изгубени во разорувањето што го зафати градот.
По катастрофата, Скопје започна ново поглавје. Од урнатините на стариот град се роди симбол на меѓународната солидарност, откако помош пристигна од целиот свет. Луѓе и држави се обединија во поддршка на скопјани, покажувајќи дека хуманоста и солидарноста не познаваат граници.
По повод годишнината, од Државниот архив на Македонија споделија кратка ретроспектива, потсетувајќи на градот пред земјотресот и на неговото повторно издигнување.
„Се урна едно безгрижно Скопје, она со долгите летни вечери, со прошетките по Корзо, игранките, ручеците во Кермес и Маргер, животот што течеше мирно покрај Вардар. По 26 јули, ништо повеќе не беше исто“, се наведува во објавата.
Од Државниот архив посочуваат дека спомените за старо Скопје денес се зачувани преку фотографиите, документите и сведоштвата, како траен запис за еден град и неговите жители.
„Во спомен на жртвите. Во чест на преживеаните и на сите кои помогнаа да се изгради одново. Во име на Скопје, градот што никогаш не престана да се бори“, порачаа од Државниот архив.
