ВЕНС ГО БРАНИ ХЕГСЕТ ОД ИМПИЧМЕНТ, А МИНИСТЕРОТ ПРОГЛАСИ ИСТОРИСКА ПОБЕДА ВО ИРАН Погодивме над 13.000 цели
Потпретседателот на САД го отфрли обидот за импичмент на министерот за одбрана, оценувајќи дека станува збор за политичка пресметка поради реформите во Пентагон
Американскиот потпретседател Џ.Д. Венс застана во одбрана на министерот за одбрана Пит Хегсет, отфрлајќи ги обидите за негов импичмент и оценувајќи дека иницијативата нема никаква врска со воените операции против Иран, туку со неговите напори за спроведување реформи во Пентагон и соочување со тамошната бирократија.
„Дали Пит Хегсет извршил дела што доведуваат до импичмент? Тоа прашање е апсурдно, а одговорот е очигледен – не“, напиша Венс на социјалната мрежа X.
Тој оцени дека постапката за импичмент се претворила во „смешна претстава“, повикувајќи го американскиот Конгрес да се посвети на вистинско креирање политики, наместо на политички пресметки, објави „The Hill“.
Во меѓувреме, Хегсет излезе со оценка дека Соединетите Американски Држави оствариле „историска воена победа“ во Иран во рамките на операцијата „Епски бес“.
Обраќајќи се пред новинарите во Пентагон, американскиот министер за одбрана изјави дека за помалку од 40 дена борбени операции биле погодени повеќе од 13.000 цели, при што, според неговите тврдења, биле сериозно уништени иранската морнарица, воздухопловните сили и воено-индустриската инфраструктура.
„Историјата ќе ја процени војната во Иран многу поинаку отколку што тоа го прави мејнстрим јавното мислење денес“, изјави Хегсет.
Тој истовремено нагласи дека САД не ја започнале војната, тврдејќи дека Иран ја започнал уште пред 47 години, објави „Фокс њуз“.
