СРБИЈА ЈА ПРОДОЛЖУВА ЗАБРАНАТА ЗА ИЗВОЗ НА НАФТА ДО 31 ОКТОМВРИ Акцизите остануваат намалени
Владата ја продолжи мерката за заштита на домашниот пазар, додека намалените акцизи за горивата ќе важат до 4 октомври.
Српската Влада во технички мандат донесе одлука за продолжување на привремената забрана за извоз на нафта и нафтени деривати до 31 октомври. Одлуката е донесена на 24 септември и објавена во „Службен гласник“.
Мерката првпат беше воведена во март, со цел да се обезбеди стабилност на домашниот пазар и да се спречи евентуален недостиг на гориво и дополнителен раст на цените, во услови на нарушувања на глобалниот нафтен пазар.
Иако првично беше предвидено забраната да важи до 19 март, рокот во неколку наврати беше продолжуван. Со последната одлука, важноста на мерката, која требаше да истече на 30 септември, се продолжува за уште еден месец.
Владата во технички мандат донесе одлука и за продолжување на мерката за намалување на акцизите на нафтените деривати за 25 проценти.
Намалените акцизи ќе се применуваат до 4 октомври.
Според одлуката, акцизата за оловниот бензин изнесува 57,41 динари за литар, што е околу 29,3 денари. За безоловниот бензин акцизата е 54 динари, односно околу 27,5 денари за литар, додека за гасното масло, односно дизелот, изнесува 55,53 динари или околу 28,3 денари за литар.
