СИЛНИ ЕКСПЛОЗИВНИ ЗВУЦИ ПРЕД ПОЖАРОТ – Кој ги запали автомобилите на гевгеличани во Карпош 1

Две патнички возила со гевгелиски регистарски ознаки целосно изгореа во пожар што избувнал ноќеска во скопската населба Карпош 1. Настанот се случил околу 05:00 часот на паркинг во близина на раскрсницата меѓу улиците „Орце Николов“ и „Никола Тесла“.

Според информациите од Министерството за внатрешни работи, опожарени се „ауди“ во сопственост на К.К. (58) и „пежо 307“ сопственост на К.К. (25). Во инцидентот нема повредени лица, но е причинета значителна материјална штета.

Пожарот зафатил и дел од околината, при што е оштетен и семафор во близина. Од МВР информираат дека се преземаат мерки за целосно расчистување на случајот, а причините за избувнувањето на огнот сè уште се утврдуваат.

Станари од околните згради изјавиле дека пред да го забележат пожарот слушнале звуци слични на пукање и почувствувале силен мирис, по што излегле надвор и го виделе огнот кој брзо ги зафатил возилата.

Претходно било пријавено дека пожарот избувнал на паркинг во близина на Технолошко-металуршкиот факултет, каде биле паркирани повеќе возила, што создало ризик од поголема штета. Благодарение на брзата интервенција на пожарникарите, огнот бил локализиран и спречено негово ширење кон останатите автомобили и околните објекти.

Во близина на местото на настанот се наоѓа и Амбасадата на Унгарија, но засега нема информации за каква било загрозеност на објектот