СЕНЗАЦИЈА ВО ХОЛАНДИЈА Луи ван Гал сака да се врати на селекторската клупа

Легендарниот Луи ван Гал повторно е во игра за селекторската функција на холандската репрезентација. Иако на 8 август ќе наполни 75 години, искусниот стратег смета дека сè уште има што да ѝ понуди на „лалињата“ и е подготвен повторно да седне на селекторското столче. Ван Гал своевремено ја напушти репрезентацијата поради здравствени проблеми, но откако успешно се избори со тешката болест, повторно е подготвен за нов тренерски предизвик.

Холандскиот „Телеграф“ објави дека Ван Гал сака да го наследи Роналд Куман, кој во јануари 2023 година го презеде кормилото на репрезентацијата токму од него. Ова би било четврто враќање на Ван Гал на селекторската позиција. Тој првпат ја водеше Холандија во периодот од 2000 до 2001 година, потоа од 2012 до 2014 година, а третпат беше селектор од 2021 до крајот на 2022 година.

Во последниот мандат, Ван Гал ја одведе Холандија до четвртфиналето на Светското првенство во Катар, по што се повлече поради здравствените проблеми. Во меѓувреме, позицијата на Роналд Куман станува сè понеизвесна. Холандија не ги оправда очекувањата на последните големи натпреварувања, а раководството на федерацијата размислува за промена на селекторот.

Покрај Ван Гал, меѓу кандидатите се споменува и Михаел Рајзигер. Тој има искуство во работата со младинските селекции на Холандија, а долго време беше и асистент на Ерик тен Хаг. Интересно е што Рајзигер како фудбалер созреваше токму под водство на Ван Гал во раните 1990-ти. Во текот на кариерата настапуваше и за Милан, Барселона, Мидлсбро и ПСВ, а професионалната кариера ја заврши во 2007 година.

Доколку навистина се реализира враќањето, Ван Гал би направил голем тренерски камбек и на 75 години повторно би ја предводел Холандија од клупата.