ПРОФЕСОРИ И СТУДЕНТИ ЗАЕДНО НА СЦЕНА – МКЦ со нов повик што буди интерес
Рокот за пријавување е до 12 мај, секој професор може да учествува со двајца студенти.
Во Младински културен центар, во соработка со Град Скопје, е објавен отворен повик за учество на традиционалната изложба „Професори и студенти“, наменета за универзитети и факултети од областа на визуелните уметности и дизајнот во Македонија.
Изложбата, која се организира секоја година, има за цел да ја зајакне врската меѓу професорите и студентите преку заедничко претставување на нивните дела. Секој професор има можност да учествува со едно дело, заедно со најмногу двајца студенти.
Пријавувањето е отворено од 28 април до 12 мај до 17 часот. Делата доставени по истекот на рокот нема да бидат вклучени во каталогот, поради продукциски и печатарски ограничувања.
Факултетите што ќе аплицираат треба да подготват дигитални фолдери, во кои секој учесник ќе има сопствен подфолдер. Потребно е да се достави фотографија од делото во JPG формат со резолуција од 300 dpi, како и придружна легенда со основни податоци: име и презиме, наслов на делото, техника, димензии и година на изработка.
Дополнително, се бара и Word документ со кратка биографија за универзитетот и неговата едукативна мисија, заедно со логото на институцијата.
Отворањето на изложбата е закажано за 20 мај 2026 година во 20 часот, во галеријата на МКЦ. Куратор на изложбата е Страхил Петровски, а како контакт лица се наведени Горјан Ѓорѓиев и Inchronax Endonax. Дизајнот на промотивниот материјал го изработи Петар Новковски.