ПЕШАЧКИОТ КАЈ БИТ ПАЗАР ПОВТОРНО ЦРНА ТОЧКА Удар врз пешаци ја вознемири јавноста

Нова сообраќајна несреќа е регистрирана во близина на Бит Пазар, на локација што подолг период се смета за една од најризичните за пешаците во Скопје.

Според првичните информации, патничко возило удрило во маж и жена додека преминувале преку коловозот. Повредените веднаш биле пренесени на медицински третман, а засега се знае дека нивните повреди не се животозагрозувачки.

На местото на несреќата интервенирале екипи на Итната медицинска помош и полициски службеници, кои извршиле увид и работат на утврдување на околностите под кои дошло до инцидентот.

Овој случај повторно го отвори прашањето за безбедноста на пешаците во овој дел од градот. Граѓаните веќе подолг период бараат поставување на официјален пешачки премин и семафорска сигнализација, со што, како што велат, би се намалил ризикот од нови несреќи.

Само неколку дена претходно беше направен обид за ограничување на преминувањето на оваа локација со поставување заштитни огради. Сепак, по реакции од локалното население и организирани протести, активностите беа прекинати, а оградите беа отстранети.

Жителите велат дека добиле уверувања оти ќе се разгледа трајно решение за проблемот, додека надлежните најавуваат анализа на можните сообраќајни интервенции.

Во изминатите години на оваа локација се случиле повеќе сообраќајни несреќи, од кои дел со тешки последици, поради што граѓаните повторно апелираат за побрза реакција од институциите.