ОРМУТСКИОТ ТЕСНЕЦ ПОД БЛОКАДА Иран без ниту еден барел, над милијарда барели нафта поминале
Американски адмирал откри што се случува во стратешкиот теснец и како САД го обезбедуваат поморскиот сообраќај.
Началникот на Централната команда на американската армија (CENTCOM), адмирал Бред Купер, изјави дека американските сили во последните неколку месеци овозможиле транспорт на повеќе од една милијарда барели сурова нафта преку Ормутскиот теснец.
Купер во видеообраќање објавено на платформата X рече дека силите на CENTCOM обезбедиле координирана заштита за повеќе од 2.000 комерцијални бродови кои минале низ стратешкиот поморски премин.
Според него, главните транзитни рути биле расчистени од мини за кои тврди дека биле поставени од иранските сили, со што бил овозможен непречен поморски сообраќај.
„Над една милијарда барели сурова нафта беа испорачани до партнерите од Заливот преку Ормутскиот теснец, а Иран не извезе ниту еден барел благодарение на нашата цврста блокада“ – изјави Купер.
Американскиот адмирал додаде дека обемот на сурова нафта, товар и течен природен гас транспортиран преку теснецот во последните две недели е најголем во последните шест месеци.
Купер истакна дека САД паралелно работат со партнерите во регионот на зајакнување на воздушната одбрана, формирање нова коалициска единица за напад со дронови и одржување на Ормутскиот теснец и околните води отворени за меѓународниот сообраќај.
Ормутскиот теснец е една од најважните светски енергетски транспортни точки, преку која поминува значителен дел од глобалната трговија со нафта и гас.
