НАЈНОВО ОД МОСКВА Русија го затвора извозот на авионско гориво до ноември

Русија воведе забрана за извоз на авионско гориво што ќе трае до крајот на ноември, со цел да се обезбедат доволни резерви на домашниот пазар, соопшти руската влада.

Според одлуката, мерката се однесува и на горивото за авиони набавено преку берзанско тргување, а ќе важи до 30 ноември.

Владата наведува дека потегот има за цел одржување на стабилноста во снабдувањето со гориво во земјата.

Од забраната се исклучени пратки што веќе поминале царински процедури пред нејзиното стапување во сила, како и испораки базирани на меѓудржавни договори.

Слична мерка беше воведена и во април, кога Русија привремено го ограничи извозот на бензин до крајот на јули, со образложение дека сака да го заштити домашниот пазар во период на зголемена побарувачка и сезонски земјоделски активности, како и поради растот на глобалните цени на нафтата и геополитичките тензии.

Москва тврди дека и понатаму презема чекори за сигурно снабдување на домашниот пазар со горива.

Одлуката доаѓа во период на засилени притисоци врз енергетските пазари, поттикнати од нестабилноста на Блискиот Исток и нарушувањата во глобалните синџири на снабдување.