ИМАШ 13 ГОДИНИ СТАЖ Можеш да докупиш уште 2 за пензија

Граѓаните кои ја достигнале законската возраст за пензионирање, но немаат доволно работен стаж за да го исполнат условот од најмалку 15 години, би можеле да добијат можност сами да ги уплатат придонесите за периодот што им недостига.

Сепак, оваа можност нема да важи за сите. Според најавеното законско решение, право на докуп на стаж ќе имаат лицата кои веќе имаат најмалку 13 години остварен работен стаж.

Ова го најави министерот за социјална политика, демографија и млади Ѓоко Велковски, посочувајќи дека предлогот веќе се разгледува во рамките на Владата.

Кој ќе може да докупи стаж?

Предложениот модел ќе се однесува на лица кои повеќе не се активни осигуреници и ја достигнале старосната граница за пензионирање – 62 години за жени и 64 години за мажи.

Практично, лице кое има 13 години стаж би можело да докупи уште најмногу 24 месеци и со тоа да го достигне законскиот минимум од 15 години стаж, потребен за стекнување право на старосна пензија.

„Откуп на стаж се однесува и ќе се однесува само на оние коишто веќе не се денеска осигуреници, наполниле 62-64 години, жени-мажи, ќе имаат право тие коишто имаат до 13 години работен стаж којшто го направиле во моментот кога ги наполниле годините на старост, значи 24 месеци да го откупат својот стаж, односно да платат за истиот“, рече Велковски.

Колку би чинел докупот?

Според објаснувањето на министерот, основицата за пресметка нема да биде целата просечна плата, туку 50 проценти од просечната плата во претходната година. На таа основица ќе се пресметува придонесот за пензиско осигурување.

На пример, доколку просечната нето-плата изнесува 45.000 денари, основицата би била 22.500 денари. Со стапка на придонес од 19,9 проценти, еден месец докупен стаж би чинел околу 4.478 денари.

Тоа значи дека докуп на 12 месеци би изнесувал околу 53.730 денари, додека за максималните 24 месеци би биле потребни околу 107.460 денари.

Сепак, конечниот износ ќе зависи од бројот на месеци што му недостигаат на лицето и од основицата утврдена согласно законските правила.

Пензијата нема да зависи само од докупот

По уплатата на придонесите и исполнувањето на условот од најмалку 15 години стаж, граѓанинот би можел да го оствари правото на старосна пензија.

Висината на пензијата нема да се пресметува според сумата што лицето ја платило за докупениот стаж, туку според редовната законска формула, која ги зема предвид остварениот стаж и примањата на кои лицето било осигурено во текот на работниот век.

„Зависно колку имале во 13-те години, формулата која ќе произлезе,  значи од 13 години колку штедел, на каква плата бил пријавен итн., ќе се покаже самата формула дополнително“, објаснува Велковски.

Со предложеното решение, Владата отвора можност лицата кои ја достигнале старосната граница, а им недостигаат најмногу две години стаж, да го исполнат условот од 15 години и да стекнат право на пензија.