ФУДБАЛСКИ ДЕБАКЛ ВО СКОПЈЕ Македонија не шутна кон голот, Швајцарија ја растури со 0:3

Македонската фудбалска репрезентација доживеа тежок пораз на стартот од Лигата на нациите, откако вечерва на Арената „Тодор Проески“ во Скопје загуби од Швајцарија со 0:3.

Резултатот можеби е доволно убедлив, но статистиката уште подобро ја отсликува разликата меѓу двете селекции. Македонија не упати ниту еден удар во рамките на голот, не изведе ниту еден корнер и не создаде ниту една голема шанса.

Швајцарија, од друга страна, упати 22 удари кон голот на Столе Димитриевски, од кои 11 во рамките на голот, а имаше и пет корнери. Очекуваните голови беа 2,14 за гостите, наспроти само 0,05 за Македонија.

Швајцарија тргна фуриозно и го презеде натпреварот

Гостите од самиот почеток наметнаа висок ритам и постојан притисок кон македонската одбрана. Нападите доаѓаа од сите страни, а Димитриевски уште во првото полувреме имаше полни раце работа.

По серијата шанси, Фројлер во 22. минута го отвори резултатот за 0:1.

Македонија не успеа да одговори, а Швајцарија продолжи да создава прилики. Гостите погодија и дирек, пропуштија уште неколку добри можности, но во 41. минута Амдоуни ја удвои предноста и на полувреме се замина со 0:2.

Второто полувреме не донесе никаква промена

Селекторот Гоце Седлоски се обиде со измени да го промени текот на натпреварот. Во игра влегоа Елези, Митровски и Омерагиќ, но сликата на теренот остана иста.

Швајцарија продолжи да контролира, а Македонија тешко успеваше да ја помине средината на теренот и да создаде сериозна закана пред противничкиот гол.

Ндоје во една ситуација излезе сам пред Димитриевски, но македонскиот голман одлично интервенираше и спречи уште еден погодок.

Амдоуни стави точка на убедливата победа

Во 74. минута Швајцарија го постигна и третиот гол.

Амдоуни со соло-акција ја мина македонската одбрана, излезе пред Димитриевски и рутински реализираше за 0:3.

До крајот резултатот не се промени. Швајцарија мирно го приведе натпреварот до крај и заслужено стигна до убедлива победа.

Македонија без гол веќе 450 минути

Поразот од Швајцарија ја продолжи и негативната серија на македонската репрезентација.

За првпат во историјата Македонија има пет последователни натпревари без постигнат гол – неверојатни 450 минути без погодок.

Во серијата се натпреварите против Данска, Република Ирска, Босна и Херцеговина, Турција и сега Швајцарија.

Особено загрижувачки е што Македонија вечерва не успеа ниту еднаш да упати удар во рамките на противничкиот гол.

Димитриевски спречи уште потежок пораз

Единствената причина поради која Македонија не прими уште повеќе голови беше Столе Димитриевски.

Македонскиот голман во неколку наврати интервенираше одлично и спречи чисти шанси на Швајцарија. Со оглед на бројот на можности што ги создадоа гостите, поразот можеше да биде и поубедлив.

Ова не е само пораз од силен противник, туку натпревар во кој Македонија во ниту еден момент не успеа да воспостави рамнотежа на теренот.

Пред репрезентацијата сега е нов предизвик. Само три дена подоцна Македонија ќе гостува кај Словенија во Љубљана во второто коло од Лигата на нациите.

По вечерашното издание, првата задача е јасна – Македонија мора да најде начин да создаде шанса, а пред сè, конечно да постигне гол.

Македонија – Швајцарија 0:3 (0:2)

Арената „Тодор Проески“, Скопје

Стрелци: Фројлер 22’, Амдоуни 41’, 74’

Македонија: Димитриевски, Илиевски (Стојчевски 75’), Зајков (Мелиќи 55’), Муслиу, Херера, Костадинов (Елези 46’), Гаштаров, Барди, Елмас, Растодер (Митровски 46’), Миовски (Омерагиќ 55’).

Швајцарија: Кобел, Родригез, Аканџи, Елведи, Атекаме, Фројлер, Јашари, Ндоје, Манзамби, Ридер, Амдоуни.