ЕВРОЗОНАТА ИЗНЕНАДИ Економијата порасна повеќе од очекуваното, но се појави нов проблем

Економијата на еврозоната оствари посилен раст од очекуваниот во вториот квартал од 2026 година, но податоците покажуваат дека економското закрепнување не се одвива со исто темпо во сите земји членки, објавува „Јуроњуз“. Според прелиминарните податоци на „Евростат“, БДП на еврозоната во периодот април-јуни пораснал за 0,4 проценти во однос на претходниот квартал. Тоа претставува значително подобрување во однос на првиот квартал, кога економијата стагнирала. Аналитичарите очекуваа квартален раст од 0,2 проценти.

Економијата на Европската Унија во истиот период пораснала за 0,5 проценти, наспроти растот од 0,1 процент во првиот квартал. На годишно ниво, БДП на еврозоната е зголемен за еден процент, додека растот на ниво на целата ЕУ изнесува 1,2 проценти. Најголем квартален раст меѓу земјите кои досега ги објавија податоците забележала Ирска, со скок на БДП од 3,9 проценти. По неа се Литванија со 1,7 проценти и Шведска со 1,4 проценти. Раст е регистриран и во Португалија од 0,8 проценти и Шпанија од 0,7 проценти.

За разлика од нив, економиите на Белгија и Австрија стагнирале. Германија, Франција и Италија забележале раст, но со различна динамика. Германскиот БДП се зголемил за 0,2 проценти, што е забавување во споредба со растот од 0,4 проценти во првиот квартал. Сепак, резултатот бил подобар од очекувањата на пазарот.

Клаус Вистесен, главен економист за еврозоната во „Пантеон Макроекономикс“, оценува дека нето-извозот бил главниот двигател на растот во вториот квартал. Во исто време, домашната потрошувачка забавила, додека инвестициите забележале пад.

Иако резултатите се подобри од очекуваните, аналитичарите предупредуваат дека економското закрепнување во еврозоната останува нерамномерно. Дополнителен предизвик е повторното забрзување на инфлацијата во Германија и Шпанија, што би можело повторно да ги засили очекувањата и дебатите околу идната каматна политика на Европската централна банка.