БОМБА ОД ГЕРМАНИЈА Обвинителите тврдат дека „Северен тек“ е разнесен по наредба од Украина
Украинецот обвинет за саботажата на гасоводот наводно признал дека бил поврзан со украинските служби.
Германските обвинители, според тврдењата на адвокатот на еден од осомничените, веруваат дека саботажата на гасоводите „Северен тек“ и „Северен тек 2“ била извршена по наредба на украински државни структури. Украинскиот државјанин Сергеј Кузнецов, кој е обвинет за учество во операцијата, наводно признал дека во периодот кога се случила саботажата бил припадник на украинските вооружени сили и работел за Службата за безбедност на Украина.
Неговата одбрана во петокот, 24 јули, соопшти дека Кузнецов дејствувал по наредба на украинските власти. Според адвокатите, ваквиот заклучок произлегува од досегашната истрага на германското обвинителство. Одбраната, исто така, тврди дека Германија наводно не ѝ предала на Италија дел од истражните материјали кои упатуваат на можна вмешаност на Украина.
Според истражителите, саботерите ја користеле едрилицата „Андромеда“, која била изнајмена во Росток. Наводно, нуркачи поставиле експлозивни направи на цевководите на дното на Балтичкото Море. Кузнецов во моментов се наоѓа во притвор во Хамбург, каде што се очекува да му се суди за неговата наводна улога во операцијата. Тој бил уапсен во Италија во летото 2025 година, по барање на германските власти, а потоа бил екстрадиран во Германија.
Саботажата се случи на 26 септември 2022 година, кога беа регистрирани сериозни оштетувања на три крака од гасоводите „Северен тек“ и „Северен тек 2“. По експлозиите, Русија покрена постапка за меѓународен тероризам. Украинските власти во минатото негираа вмешаност во нападот. Во март 2023 година, украинскиот претседател Володимир Зеленски изјави дека Украина не стои зад саботажата.
Германските истражители подоцна започнаа да ги следат лицата кои наводно биле поврзани со операцијата, а во јавноста се појавија информации дека истрагата можеби ги идентификувала членовите на групата која учествувала во саботажата. Според истражните наводи, Кузнецов бил дел од екипажот на „Андромеда“ и имал координативна улога во операцијата.
Случајот предизвика големи меѓународни реакции и отвори бројни прашања околу тоа кој стои зад нападот врз критичната енергетска инфраструктура во Балтичкото Море. Рускиот претседател Владимир Путин претходно изјави дека целта на експлозиите била уништување на европската енергетска инфраструктура.
