МКЕДОНСКИОТ РУБИН ТРГНУВА ВО СВЕТОТ Се отвора ново поглавје за минералното богатство на Македонија

По воспоставувањето институционална заштита на македонскиот рубин како едно од автентичните минерални богатства на земјата, започнува нова фаза во неговата афирмација и промоција, заедно со целокупното геолошко наследство на Македонија.

Министерката за енергетика, рударство и минерални суровини Сања Божиновска и претседателот на Здружението за промоција на природните науки „Откритие“, Илија Петковски, потпишаа Меморандум за соработка со кој се обединуваат институционалните, научните и стручните капацитети за заштита, промоција и валоризација на геонаследството, минералното богатство и палеонтолошкото наследство на земјата.

Меморандумот е продолжение на активностите на Министерството за афирмација и заштита на македонското минерално богатство. По правната заштита на македонскиот рубин, следниот чекор е негово пошироко претставување пред домашната и меѓународната јавност како еден од препознатливите симболи на геолошкото наследство на Македонија.

„Македонија поседува исклучително богато геолошко наследство кое со децении било недоволно промовирано и заслужува многу поголема видливост. Нашата цел е тоа богатство да стане подостапно за јавноста, да ја развиваме научната свест и да ја доближиме геологијата до граѓаните. Особено важно е да го поттикнеме интересот кај младите за природните науки, да го развиваме геотуризмот и да покажеме дека природните богатства се дел од нашиот национален идентитет и развоен потенцијал. Македонскиот рубин е еден од највредните симболи на тоа наследство и заслужува достојно да биде претставен пред светот“, истакна Божиновска.

Соработката предвидува организирање изложби, научно-популарни настани, јавни предавања, работилници, едукативни програми и тематски поставки. Предвидено е и воспоставување партнерства со домашни и странски музеи, универзитети и научни институции со цел промоција и афирмација на македонското геолошко наследство.

На потпишувањето присуствуваше и Деан Шкартов, долгогодишен член и соработник на Здружението „Откритие“ и еден од познавачите и промоторите на македонскиот рубин. Неговата богата минералошка колекција претставува значаен придонес во афирмацијата на македонското геолошко наследство во земјата и во странство.

Како дел од партнерството, во просториите на Министерството ќе биде формиран Центар за промоција на геонаследството. Центарот е предвидено да прерасне во постојан изложбен и едукативен простор каде ќе бидат презентирани минерали, кристали, фосили и други геолошки експонати.

Преку овој центар, институциите, научната и стручната јавност ќе работат заеднички на заштита, валоризација и меѓународна промоција на македонското геолошко наследство, како и на развојот на геотуризмот и подигнувањето на свеста за природните богатства на земјата.

„Министерството за енергетика, рударство и минерални суровини со оваа иницијатива уште еднаш потврдува дека природните ресурси не се само економски потенцијал, туку и национално богатство кое треба да се заштити, научно да се вреднува и достојно да се претстави пред идните генерации и пред светот“, порачаа од Министерството.