ВМРО-ДПМНЕ Како Заев, од просечно земјоделско семејство, стаса до сопствеништво на авиокомпании?

Во најновото соопштение до јавноста, ВМРО-ДПМНЕ упати сериозни обвинувања кон поранешниот министер за здравство Венко Филипче и поранешниот премиер Зоран Заев, обвинувајќи ги за сомнителни финансиски трансакции и луксузни инвестиции во странство, вклучително и во недвижности и авиоиндустријата во Дубаи.

Од партијата велат дека Филипче молчи пред јавноста, што според нив, е потврда дека СДСМ и неговите функционери не се водени од интересите на граѓаните, туку од лични бизнис профити.

„Филипче ја игнорира јавноста, а со тоа покажува дека единствен фокус му е како да дојде до власт за повторно да си делат провизии, тендери и да ги шират фамилијарните бизниси,“ се наведува во соопштението на ВМРО-ДПМНЕ.

Опозицијата прашува дали парите за, како што велат, купување милионски акции во индиска авиокомпанија и изградба на 50-катница во Дубаи потекнуваат од, според нив, скандалозни тендери во здравството за време на мандатот на Филипче. Дополнително, партијата поставува прашања за можно користење на криптовалути, како биткоин, за извршување на овие трансакции.

„Дали бизнис партнерите Филипче-Заев имале акции во индиска авиокомпанија и од каде им се средствата за градење 50-катница во Дубаи? Како Заев, од просечно земјоделско семејство, стаса до сопствеништво на авиокомпании?“ прашуваат од ВМРО-ДПМНЕ.

Според нив, т.н. „тендер тандем“ Заев-Филипче молчи за потеклото на капиталот и златните визи за Дубаи, што дополнително ги продлабочува сомнежите.

СДСМ засега нема официјален одговор на овие обвинувања. Од ВМРО-ДПМНЕ порачуваат дека народот заслужува одговори и транспарентност.

„СДСМ е синоним за корупција, криминал и предавства“, завршува соопштението на опозициската партија.

Останува да се види дали надлежните институции ќе отворат истрага за наводите или пак јавноста ќе остане без одговори на прашањата кои, според ВМРО-ДПМНЕ, директно го тангираат националниот интерес и буџетот на државата.