СДСМ СО ЖЕСТОКА ОФАНЗИВА ПРОТИВ МИЦКОСКИ Го нападна за пензиите, економијата и криминалот

СДСМ излезе со две остри реакции кон премиерот Христијан Мицкоски и ВМРО-ДПМНЕ, оспорувајќи ги оценките на Владата за растот на пензиите, економските резултати и состојбата со криминалот во државата. Опозициската партија притоа изнесе низа сериозни обвинувања за начинот на кој власта ги користи државните институции и јавните средства.

Првата реакција на СДСМ е насочена кон изјавите на Мицкоски за економските резултати на Владата и неговото тврдење дека пензиите бележат значително поголем раст во споредба со периодот кога на власт беше СДСМ.

„Овој пат пензиите му пораснале ‘16 пати’ повеќе отколку во времето на СДСМ, а граѓаните наводно живееле подобро отколку пред три години. 16 пати. Не процент. Пати“, реагираат од опозициската партија.

СДСМ ги оспорува и тврдењата за економскиот напредок, туризмот и авиосообраќајот, оценувајќи дека статистичките показатели што ги презентира Владата не се совпаѓаат со секојдневното искуство на граѓаните.

„Македонија кај него е економски тигар. Само народот тоа уште не го видел на сметката“, наведува СДСМ.

Од партијата велат дека граѓаните економската состојба ја чувствуваат преку цените во продавниците и аптеките, сметките за струја и висината на сопствените приходи.

СДСМ повторно го отвора и прашањето за средствата од Државната лотарија за одбележувањето на 35-годишнината од независноста. Опозицијата тврди дека за ова биле издвоени 5,5 милиони евра и ја обвинува власта дека јавните средства ги користи за политичка промоција.

Критики се упатени и кон состојбите во ПИОМ и вториот пензиски столб, при што СДСМ тврди дека финансиските проблеми се обидуваат да се покриваат на товар на пензиските заштеди на граѓаните.

„Нема 16 пати поголем раст. Има 16 пати поголем цинизам. Нема подобар живот од пред три години. Има само режија на лагата“, порачуваат од СДСМ.

Во второто соопштение СДСМ ја напаѓа изјавата на Мицкоски дека „нема веќе банди, нема веќе криминал, нема рекетирање, нема марихуана економија, нема провизии од Лотарија“.

Опозицијата тврди дека оваа изјава претставува „автопортрет на власта“.

„Нема мали банди точно, има само една голема, таа контролира сè. Нема повеќе улични банди има партиска“, обвинува СДСМ.

Партијата понатаму изнесува тешки тврдења за наводно партиско влијание врз јавните набавки, правосудството, безбедносните институции, енергетиката и игрите на среќа. Во реакцијата се споменува и случајот со петте тони марихуана, за кои СДСМ тврди дека биле пренесени преку границата и царината кон Србија, наводно и со полициска придружба. Од опозицијата бараат ваквите случаи да се расчистуваат преку независни истраги, а не преку политички пресметки и изјави.

„Криминалот не исчезнува со изјава. Исчезнува со истрага која не застанува пред презиме, функција и партиска книшка“, велат од СДСМ.

Во двете денешни реакции СДСМ користи исклучително остра реторика кон премиерот Мицкоски и ВМРО-ДПМНЕ, при што го нарекува Мицкоски „арамија“ и „шеф на банда“, додека владејачката партија ја квалификува како „ВМРО-ОКГ“.

Така, политичката пресметка меѓу власта и опозицијата денес доби ново остро продолжение со пензиите, економијата, Лотарија и борбата против криминалот како главни фронтови.