ЗОШТО НЕ МЕ УАПСИВТЕ Вучиќ и Хелез влегоа во жестока пресметка по посетата во БиХ

Претседателот на Србија, Александар Вучиќ, ги отфрли како „лаги“ тврдењата на министерот за одбрана на Босна и Херцеговина, Зукан Хелез, дека полицијата на Република Српска навлегла на територијата на Федерацијата БиХ за време на неговата посета на Бугојно.

Хелез, пак, возврати дека безбедносните служби на БиХ детално ја следеле посетата на српскиот претседател и дека, доколку постоел налог за негово апсење, Вучиќ немало да биде заштитен од обезбедувањето.

Спорот започна по изјавите на Хелез дека припадници на Министерството за внатрешни работи на Среднобосанскиот кантон отстраниле група вооружени лица во близина на Чипуљиќи кај Бугојно, за кои тврдел дека не биле дел од официјалното обезбедување на Вучиќ.

Вучиќ ги отфрли тие наводи, нагласувајќи дека лицата кои биле со него не биле од Србија, туку припадници на специјалните единици на МУП на Република Српска.

„Знаете ли каква лага е тоа? Ниту еден човек не беше од Србија. Тие луѓе беа членови на МУП на Република Српска и тоа е прашање на нивна надлежност. Сè што беше напишано беше лага“, изјави Вучиќ.

Тој додаде дека Хелез, според него, со години изнесува неточни тврдења, потсетувајќи и на неговите претходни изјави поврзани со таканареченото „Сараевско сафари“.

„Зошто не ме уапсивте, лажго? Лажевте две години. Дојдов пред вашите нозе, зошто не ме уапсивте?“, порача Вучиќ.

Одговарајќи на изјавите на српскиот претседател, Зукан Хелез порача дека институциите на БиХ биле информирани за секој детал од посетата.

„Нека знае Александар Вучиќ дека го следевме секој негов потег за време на неговиот престој во Босна и Херцеговина. Доколку имало барање за негово апсење, тој ќе бил уапсен“, напиша Хелез на Фејсбук.

Според него, посетата на Вучиќ била „внимателно режиран политички настап“, а надлежните служби биле запознаени со целата организација. Хелез го повика Вучиќ заедно да прошетаат низ Белград, Нови Сад и Ниш, тврдејќи дека српскиот претседател не може слободно да се движи низ сопствената земја без организиран прием.

Министерот за одбрана на БиХ оцени дека политичкото време на Вучиќ „наскоро минува“, наведувајќи дека младите бараат промени. Тој ја критикуваше политиката на Белград кон Србите во регионот, обвинувајќи ја за поделби и иселување.

„Големосрпската политика што Вучиќ ја застапуваше со години остави зад себе поделби, емиграција и празни огништа“, порача Хелез.

Тој нагласи дека неговите изјави, како што рече, не се насочени кон српскиот народ, туку кон политиките кои, според него, се спротивни на помирувањето и регионалната соработка.