РЕАЛ НЕ МУ ДАВА, АРСЕНАЛ МУ НУДИ СЕ Винисиус пред сензационален трансфер
Бразилецот бара услови слични на оние што ги има Мбапе, но „кралевите“ засега одбиваат да попуштат.
Се чини дека големиот трансфер конечно би можел да стане реалност. Винисиус Жуниор би можел да го напушти Реал Мадрид и да се пресели во Арсенал, откако преговорите за продолжување на договорот со шпанскиот гигант очигледно влегуваат во сериозна криза. Бразилецот денеска се врати на тренинзите на Реал Мадрид по заслужениот одмор, но неговата иднина во клубот повторно е во центарот на вниманието. Според последните информации, неговите агенти и понатаму ги бараат истите услови за продолжување на соработката.
Станува збор за 20 милиони евра нето годишно, 100 отсто од маркетиншките права, по примерот на договорот на Килијан Мбапе, како и дополнителен бонус за продолжување на договорот.
Токму последното барање претставува најголем проблем за Реал Мадрид. Флорентино Перез досега не практикувал да исплаќа вакви бонуси на фудбалери кои веќе се дел од клубот. Такви услови имале играчите кои пристигнувале како слободни агенти, како што беше случајот со Мбапе, а сега и со Бернардо Силва.
Винисиус, од друга страна, очигледно смета дека неговиот статус во Реал Мадрид треба да биде финансиски изедначен со оној на Мбапе. Бразилецот сака да биде меѓу најплатените играчи во клубот, а доколку Реал не попушти, Арсенал е подготвен да ја искористи ситуацијата. Според информациите кои се појавија во последните денови, лондонскиот клуб на Винисиус му нуди околу 400.000 фунти неделно, плус бонус за потпис. Микел Артета, наводно, го гледа Бразилецот како нова голема ѕвезда на левата страна од нападот.
Арсенал воедно го расчистува просторот за ново големо име. Леандро Тросар веќе го напушти клубот, додека неизвесна е и иднината на Габриел Мартинели. Во составот пристигна и Христос Колис, но јасно е дека доколку Винисиус навистина стане достапен, „топчиите“ би можеле да направат спектакуларен потег.
Замислата Винисиус Жуниор и Букајо Сака да играат заедно на крилните позиции звучи спектакуларно. Доколку Арсенал успее да го реализира трансферот, тоа би можело да биде еден од најголемите, а можеби и најголемиот трансфер во историјата на клубот.
Сега останува клучното прашање – дали Реал Мадрид ќе попушти пред барањата на својата бразилска суперѕвезда или Винисиус навистина ќе го напушти „Сантијаго Бернабеу“ и ќе се пресели во Лондон?
ВИНИСИУС ЈА НАПУШТА „КРАЛСКАТА“ КУЌА Реал му постави ултиматум, Арсенал подготвува трансфер-бомба
