НЕОЧЕКУВАН ПРЕСВРТ Поранешниот премиер Ципрас формира нова партија

Поранешниот грчки премиер Алексис Ципрас се врати на политичката сцена со формирање нова партија, обидувајќи се да го капитализира растечкото незадоволство во јавноста поради корупциски скандали, пад на животниот стандард и ерозија на довербата во владата на Киријакос Мицотакис.

Во Атина, Ципрас ја претстави новата политичка платформа „Грчки левичарски сојуз“ (ЕЛАС), со која има цел да ги обедини разочараните гласачи од левицата и центарот, како и граѓаните кои во последните месеци протестираат против серијата скандали што ја потресуваат грчката политика.

Тој пред поддржувачите, собрани во близина на Акропол, изјави дека „профитерството, корупцијата и спрегата на интереси станаа правило за стекнување богатство и моќ во современа Грција“.

Ципрас, кој како лидер на Сириза ја водеше земјата низ најтешките моменти на должничката криза во 2015 година и преговорите со ЕУ и ММФ, сега се обидува да направи политички камбек во период кога владејачката Нова демократија се соочува со пад на поддршката.

Владата на Мицотакис е под силен притисок поради повеќе афери, меѓу кои скандалот со прислушување политичари и новинари, како и обвинувања за злоупотреба на европски земјоделски фондови.

Дополнително, незадоволството беше засилено и од масовните протести по железничката несреќа кај Темпи во 2023 година, во која загинаа 57 лица, а дел од јавноста ја обвини државата за сериозна негрижа.

Ципрас оцени дека Грција се оддалечува од европските вредности и владеењето на правото, најавувајќи дека неговата нова партија ќе се залага за независни институции, посилна социјална политика и повисоки плати.

„Денес се раѓа нова политичка сила која не само што сака промена на власта, туку и промена на политиката“, порача тој.

Иако аналитичарите сметаат дека засега Ципрас нема капацитет директно да ја загрози владата на Мицотакис, неговото враќање може дополнително да ја фрагментира опозицијата и да ја отежни битката за парламентарно мнозинство на следните избори.

Според анкетите, Нова демократија сè уште води со околу 26% поддршка, но тоа е значително помалку од 41% освоени на изборите во 2023 година. Новата партија на Ципрас веќе се позиционира како втора политичка сила, пред ПАСОК и другите опозициски партии.