25 ГОДИНИ ОД ТРАГЕДИЈАТА КАЈ ЉУБОТЕНСКИ БАЧИЛА Сеќавање на осумте бранители кои загинаа во 2001 година
На 10 август 2001 година загинаа осум припадници на резервниот состав на Армијата – денеска Македонија се сеќава на нивната жртва.
На денешен ден, 10 август 2001 година, Македонија ја погоди една од најтешките трагедии за време на вооружениот конфликт. Кај месноста Љуботенски Бачила, животот го загубија осум припадници на резервниот состав на Армијата, додека уште осуммина беа повредени.
Трагичниот настан се случил околу 8 часот наутро, кога армиски воен камион, кој превезувал муниција, налетал на две противтенковски мини поставени на патот. По експлозиите избувнала повеќечасовна престрелка меѓу припадниците на ОНА и армиските сили.
Во борбите биле ангажирани и хеликоптери Ми-24. По нивното дејствување, припадниците на ОНА се повлекле од подрачјето.
Во трагичниот настан кај Љуботенски Бачила загинаа:
- Томе Бадаревски (33)
- Марјанчо Бошковски (28)
- Томе Димовски (37)
- Ивица Златевски (24)
- Бранко Јанев (36)
- Раде Јанковски (32)
- Томислав Настевски (27)
- Гоце Чанкуловски (39)
Дваесет и пет години подоцна, споменот на осумтемина загинати бранители останува дел од најтешките сеќавања од конфликтот во 2001 година. Годишнината повторно потсетува на нивната жртва и на човечката цена на тогашните вооружени судири.
По повод 25-годишнината, делегација на Генералштабот на Армијата и Министерството за одбрана, предводена од началникот на Генералштабот, генерал-мајор Сашко Лафчиски, денеска ќе им оддаде почит на загинатите припадници на резервниот состав.
Во рамки на одбележувањето ќе биде положено цвеќе и венци на повеќе спомен-обележја посветени на загинатите бранители.
Првата активност е предвидена во 8 часот кај спомен-обележјето на паднатиот бранител Томислав Настевски во Општина Ѓорче Петров. Во 8:30 часот ќе биде оддадена почит кај споменикот на паднатите бранители во селото Волково.
Во 10 часот делегацијата ќе положи венци кај споменикот на загинатите бранители во селото Љубанци, а во 12 часот ќе биде положено цвеќе и кај спомен-плочата во касарната „Илинден“.
По 25 години, имињата на осумтемина бранители остануваат запишани во сеќавањето на Македонија.
