ВУЧИЌ ЖЕСТОКО УДРИ ПО ОНИЕ ШТО ГО НАПУШТААТ Ми се гади од таквите луѓе

Српскиот претседател Александар Вучиќ упати остри критики кон оние што, како што вели, ги напуштаат своите соработници и ги предаваат идеите и политичките програми во најтешките моменти. Во видеообраќање, Вучиќ порача дека токму во кризни ситуации најгласни стануваат оние што се откажуваат од заедничките цели и луѓето со кои претходно соработувале.

„Оние што ве напуштаат, оние што вршат предавство на идеи, планови, програми и луѓе, во првите тешки моменти се најгласни“, изјави Вучиќ, додавајќи дека таквото однесување го згрозува, но не го изненадува.

Осврнувајќи се на луѓето што, според него, се откажуваат од соработката по долгогодишна поддршка, Вучиќ рече дека наместо да ги објаснат своите постапки, тие често настапуваат со лутина кон оние што ги напуштаат.

„Секогаш се лути на вас, а не да кажат: „Жал ми е, морав“. Не, не секогаш имаат доволно причини да го прават тоа“, рече српскиот претседател.

Тој додаде дека некои од нив, како што тврди, биле незадоволни во изминатите 12 до 14 години, но тоа не го покажувале и не се откажувале од соработката.

„Ми се гади од таквите луѓе и не сум изненаден“, порача Вучиќ.

Покрај критиките, Вучиќ во видеото најави и претстојни партиски активности на Српската напредна странка (СНС). Според најавата, утре ќе се одржи состанок на Извршниот одбор, додека задутре се планирани состаноци на Претседателството, Главниот одбор и пратеничката група на партијата.