УНГАРИЈА ГИ ОТВОРА ТАЈНИТЕ ДОСИЕЈА На 4 ноември ќе се објават архивите на поранешната тајна полиција
Премиерот Петер Маѓар го исполнува предизборното ветување за објавување на документите од времето на комунистичката диктатура, оценувајќи дека без соочување со минатото нема вистинска политичка промена.
Унгарија на 4 ноември ќе ги објави досиејата на поранешната тајна полиција од времето на социјалистичката диктатура. Ова го најави премиерот Петер Маѓар, чија партија ТИСА вети отворање на чувствителните архиви уште во предизборната кампања.
„Исполнувајќи едно од главните ветувања, на 4 ноември ќе ги објавиме досиејата на тајната полиција на социјалистичката диктатура“, напиша Маѓар на социјалната мрежа X.
Тој призна дека објавувањето ќе отвори тешки и чувствителни прашања за многу семејства, но порача дека соочувањето со минатото е неопходно.
„Без соочување со минатото, не може да има вистинска политичка промена“, истакна унгарскиот премиер.
По преземањето на власта во април, владата во септември протурка закон за декласификација на документите низ парламентот. Првично беше планирано базата на податоци да биде достапна во октомври, но нејзиното официјално објавување беше одложено за 4 ноември.
Датумот има и историско значење за Унгарија. На тој ден се одбележува годишнината од советската воена интервенција во 1956 година, со која беше задушена Унгарската револуција.
Отворањето на архивите се очекува да овозможи увид во работењето на поранешниот репресивен апарат и да отвори ново поглавје во соочувањето на земјата со комунистичкото минато.
