УЈП ИСПРАТИ ИТНА ОПОМЕНА – Кој не платил данок сега е на удар на присилна наплата

Управата за јавни приходи потсетува дека на 16 април истече законскиот рок за плаќање на разликите по годишните даночни биланси за 2025 година и ги повикува сите обврзници кои сè уште не ја извршиле уплатата тоа да го сторат без одложување.

Од институцијата посочуваат дека навременото подмирување на даночните обврски е од суштинско значење за стабилни јавни финансии и непречено функционирање на јавните услуги. Доцнењето, пак, резултира со зголемување на долгот по основ на камати и носи ризик од присилна наплата, блокада на банкарски сметки и други мерки.

Од вкупно 19.550 поднесени даночни биланси за данок на добивка, данок на вкупен приход и данок на личен доход кај вршители на дејност, каде е утврдена обврска за плаќање, кај 10.252 веќе е евидентирана уплата, што укажува на задоволително ниво на даночна дисциплина.

УЈП информира дека веќе испраќа персонализирани известувања до фирмите и вршителите на дејност со заостанати долгови и апелира на итно подмирување за да се избегнат дополнителни трошоци. Во спротивно, ќе се пристапи кон присилна наплата, со дополнителни давачки како еднократни такси и банкарски трошоци кои дополнително го зголемуваат долгот и може да влијаат врз тековното работење.

Исто така, се потсетува дека обврските може да се платат и од трето лице, како и преку пребивање со постојни даночни побарувања, а постои и можност за плаќање на рати, согласно законските услови.