ТРИ СЕСТРИ СО ДОЛГ АПЛАУЗ Ја отвораат новата сезона на МНТ
Претставата на Нела Витошевиќ вечерва ја има официјалната премиера на Големата сцена.
Со долг аплауз и три враќања на актерската екипа на сцената заврши синоќешната претпремиера на „Три сестри“ во Македонскиот народен театар. Вечерва, 25 септември, претставата официјално ја отвора новата театарска сезона 2026/2027 на Големата сцена на МНТ.
Новото сценско читање на култната драма на Антон Павлович Чехов ја пречека публиката со современ пристап. Драмскиот текст го потпишуваат Васил Христов и Нела Витошевиќ, додека драматургијата е на Викторија Рангелова-Петровска.
Претставата не е класична адаптација на Чехов. Авторскиот тим преку приказната за Ирина, Маша и Олга отвора современи теми за луѓето кои копнеат по промена, но остануваат заробени меѓу реалноста и животот што го замислуваат.
„Ја гледам како приказна за луѓе и за едно општество заглавени во мртва точка“, вели режисерката Нела Витошевиќ.
Трите сестри ги играат Дарја Ризова, Наталија Теодосиева и Верица Недеска. Во актерската екипа се и Дамјан Цветановски, Благој Веселинов, Емил Рубен, Ивица Димитријевиќ, Нина Деан и Антонио Ташковски.
Сценографијата е на Игор Васиљев, костимографијата на Роза Трајческа, а музиката на Огнен Анастасовски.
„Три сестри“ носи и новина за МНТ – можност дел од програмата да се следи со превод на англиски јазик, со што театарот ја отвора сцената и кон странската публика.
Официјалната премиера е вечерва во 20 часот на Големата сцена на МНТ, а следната изведба е закажана за 5 октомври.
