СТРОГИ ЗАБРАНИ Познатите личности веќе нема да смеат да рекламираат коцкање
Правило од 500 метри од училиштата, забрана за агресивно рекламирање и електронски надзор на сите автомати – државата воведува најобемни измени во секторот на игрите на среќа во последните години.
Собранието го усвои новиот Закон за игрите на среќа и забавните игри, со кој се воведуваат значително построги правила за работењето на казината, автомат-клубовите и организаторите на електронски игри на среќа. Новите законски решенија имаат за цел подобра заштита на младите, поголема контрола врз индустријата и намалување на сивата економија.
Една од клучните новини е воведувањето задолжителна оддалеченост од најмалку 500 метри меѓу основните и средните училишта и казината, автомат-клубовите и објектите во кои се организираат електронски игри на среќа. Со ова, според предлагачите, треба да се намали изложеноста на младите на коцкањето.
Законот, сепак, не предвидува автоматско затворање на сите спортски обложувалници што се наоѓаат во близина на училиштата. Тие ќе можат да продолжат со работа, но во радиус од 500 метри нема да смеат да поставуваат видео-лотариски терминали и друга електронска опрема за игри на среќа.
Новите правила носат и значителни ограничувања во рекламирањето. Забранети ќе бидат агресивните светлечки реклами на фасадите и излозите, како и рекламни пораки што го претставуваат коцкањето како начин за брза заработка, финансиски успех или решение за личните проблеми.
Дополнително, нема да биде дозволено користење на познати личности во рекламните кампањи, ниту каква било промоција насочена кон деца и малолетници, со цел игрите на среќа да бидат помалку присутни во јавниот простор.
Законот воведува и електронски систем за контрола на автоматите и видео-лотариските терминали. Секој апарат ќе мора да биде поврзан со системот на Управата за јавни приходи, што ќе им овозможи на институциите во реално време да ја следат неговата локација и работење.
На овој начин државата очекува полесно откривање на нелегално поставените автомати, спречување на прикривањето приходи и поефикасен надзор врз индустријата. Истовремено се воведуваат повисоки банкарски гаранции, построги услови за добивање лиценци, повисоки надоместоци за отворање нови објекти и проширени можности за одземање лиценци при прекршување на законските одредби.
Една од најзначајните новини е обезбедувањето нов извор на финансии за македонската кинематографија. Според законот, три проценти од давачките што се собираат од игрите на среќа ќе се издвојуваат за Агенцијата за филм, а средствата ќе се користат за поддршка и развој на домашната филмска продукција.
И понатаму ќе продолжи финансирањето на националните инвалидски организации, здруженијата кои работат на спречување на семејното насилство и Црвениот крст.
Со новиот закон државата најавува поголема заштита на младите, посилна контрола врз приредувачите на игри на среќа и поефикасна борба против сивата економија. Колку овие мерки ќе дадат резултат ќе зависи од нивното доследно спроведување, инспекцискиот надзор и почитувањето на новите законски обврски.
