ШТО ДОГОВОРИЈА МУЦУНСКИ И ВРВОТ НА АМЕРИКАНСКАТА ДИПЛОМАТИЈА Во фокус НАТО, економијата и Западниот Балкан
Министерот Тимчо Муцунски во Вашингтон се сретна со заменик-државниот секретар на САД, Кристофер Ландау, при што беше потврдена заложбата за продлабочување на стратешкото партнерство и соработката во одбраната, енергетиката, економијата и регионалната безбедност.
Во рамките на работната посета на Вашингтон, министерот за надворешни работи и надворешна трговија Тимчо Муцунски оствари средба со заменик-државниот секретар на Соединетите Американски Држави, Кристофер Ландау.
На средбата беше потврдена заедничката заложба за понатамошно продлабочување на стратешкото партнерство и јакнење на билатералната соработка меѓу Македонија и САД, со акцент на интересите и благосостојбата на граѓаните на двете земји.
Главните теми на разговорот беа унапредувањето на соработката во областа на одбраната, сојузништвото во НАТО, економскиот развој, енергетската безбедност и регионалната поврзаност.
Муцунски и Ландау разменија мислења и за актуелните состојби на Западниот Балкан, при што ја нагласија важноста од континуираниот ангажман на Соединетите Американски Држави во зачувувањето на мирот, стабилноста и просперитетот во регионот.
