РУСИЈА ЈА ЗАСИЛУВА ХИБРИДНАТА ВОЈНА ВО ЕВРОПА Ќе ви го отежниме животот

Русија ги засилува хибридните операции против европските земји, а европски претставници предупредуваат дека сè поризичните активности би можеле да доведат и до цивилни жртви.

Според „Блумберг“, Москва во последниот период е поврзана со низа активности во Европа, меѓу кои саботажи, палежи, напади врз критична инфраструктура, кибернапади и нарушување на воздушниот простор.

Извор близок до Кремљ за „Блумберг“ изјавил дека Русија има намера да ѝ го „отежни животот“ на Европа поради нејзината поддршка за Украина, користејќи асиметрични хибридни операции.

Сè поагресивни и поризични операции

Русија претходно беше обвинувана за мешање во изборни процеси и за користење на мигрантските движења кон Европа како средство за политички притисок. Сега, според „Блумберг“, активностите опфаќаат поширок спектар на операции.

Еден претставник на НАТО за „Блумберг“ изјавил дека во изминатите два месеци биле забележани активности насочени кон одбранбената индустрија и логистичките цели поврзани со европската поддршка за Украина.

Според него, кампањата станува поагресивна и носи поголеми ризици, иако целта не е нужно директно нанесување физичка штета, туку остварување стратешки цели.

Емили Ферис од Британскиот кралски институт за одбранбени и безбедносни студии (RUSI) оцени дека Русија континуирано ги бара слабостите во инфраструктурата на НАТО и е подготвена да користи различни тактики и цели.

Операции со можност за негирање

Европските безбедносни претставници сметаат дека Москва стои зад дел од овие активности, при што операциите се организираат така што руските власти можат да негираат директна вмешаност.

Според „Блумберг“, извршителите често се ангажираат преку посредници и за финансиски надомест, што дополнително го отежнува утврдувањето на директната одговорност.

Разузнавачки извори за агенцијата наведуваат дека Русија ги засилува ваквите активности во услови на зголемен притисок врз нејзината економија по украинските напади врз логистички центри, како и врз енергетскиот и горивниот сектор.

Европа не отстапува од поддршката за Украина

Според „Блумберг“, колку повеќе Украина ги засилува нападите врз руски цели, толку поголем е притисокот од Москва врз европските држави поради нивната поддршка за Киев.

Германскиот министер за внатрешни работи Александар Добриндт изјави дека Германија станува „секојдневна цел на хибридно војување“.

И покрај тоа, Германија најави дополнителна испорака на ракети за украинските системи за воздушна одбрана и започна со масовно производство на беспилотни летала наменети за украинската армија.

Европските претставници предупредуваат дека зголемувањето на интензитетот и ризичноста на хибридните операции ја зголемува и опасноста од инциденти со сериозни последици, вклучително и можни цивилни жртви.