ХАОС ВО СЕУТА Полицијата интервенираше со предупредувачки истрели при преместување на стотици мигранти
Мигрантите тргнале кон новиот камп од страв дека ќе останат без место, а ситуацијата за кратко време излегла од контрола.
Полицијата интервенираше во Сеута откако стотици мигранти рано во петокот излегоа на улиците при преместувањето од импровизираните кампови во нови привремени сместувачки капацитети.
Снимките од местото покажуваат голем број мигранти како трчаат низ пристанишниот дел на шпанската енклава, откако полицијата околу 7 часот наутро започнала со нивно преместување од камповите поставени на плажите.
Ситуацијата за кратко време станала хаотична. Полицајците интервенирале физички против дел од мигрантите, а биле испукани и предупредувачки истрели со цел да се воспостави ред.
По интервенцијата, полицијата ја ставила ситуацијата под контрола, а мигрантите биле преместувани во новите сместувачки капацитети во помали групи, објавува „Ел Паис“.
Новиот камп може да прими 1.700 луѓе
Новиот привремен камп во Муеле де Пониенте, во пристаништето на Сеута, има капацитет за околу 1.700 лица.
Според властите, дел од мигрантите се упатиле кон објектот во обид навреме да обезбедат место, стравувајќи дека капацитетот брзо ќе биде исполнет.
Тензиите во Сеута се зголемија по масовното пристигнување на повеќе од 70.000 луѓе од Мароко на 30 и 31 јули. Во тие настани, според достапните податоци, загинале најмалку 141 лице.
Повеќе од 90 проценти од пристигнатите во меѓувреме се вратиле во Мароко, но властите проценуваат дека околу 5.000 лица сè уште се наоѓаат во Сеута. Многумина од нив престојуваат на улиците или во импровизирани кампови.
Мигрантската криза предизвика политички судир
Ситуацијата во Сеута предизвика и остри политички реакции во Шпанија.
Десничарската Народна партија (ПП) и Вокс ја обвинија владата на премиерот Педро Санчез дека не успеала соодветно да ја заштити границата. Санчез, пак, изјави дека неговата влада реагирала брзо и хумано на кризата.
Дополнителни реакции предизвика и полициски извештај во кој мароканските безбедносни сили биле обвинети за „пасивност“ за време на масовното преминување.
Мароко ги отфрли овие тврдења, додека Санчез изјави дека нема докази за таквите наводи.
Подоцна објавени разузнавачки документи покажале дека и шпанските и мароканските власти претходно биле предупредени за можноста од масовно преминување.
Европската комисија во меѓувреме одобрила итна финансиска помош од 114,7 милиони евра за Шпанија, додека Европската Унија ги ангажирала своите агенции за поддршка во справувањето со мигрантската криза.
