РЕКОРДЕН СКОПСКИ МАРАТОН 15.050 тркачи од 63 земји во недела ќе го освојат Скопје

На 4 октомври Скопје ќе биде во знакот на спортот и трчањето. На 22. издание на Виз Ер Скопскиот маратон ќе настапат рекорден број учесници, а околу 500 волонтери ќе се грижат за поддршката и организацијата на настанот.

Сè е подготвено за 22. издание на Виз Ер Скопскиот маратон, кој ќе се одржи во недела, на 4 октомври. Главниот град повторно ќе ги отвори улиците за илјадници маратонци, рекреативци и љубители на трчањето од земјата и странство.

На денешната традиционална прес-конференција во Europe House беа презентирани подготовките, организацијата и програмата на еден од најголемите спортски настани во Македонија.

Годинава маратонот поставува нов рекорд со 15.050 пријавени учесници од 63 земји, потврдувајќи го својот меѓународен карактер. Покрај домашните натпреварувачи, меѓу најбројните странски учесници се оние од Србија, Германија, Велика Британија и Турција. На стартот ќе има и елитни тркачи кои ќе се борат за најдобрите резултати.

Претседателот на Сојузот на спортови на Скопје, Зоран Стојановиќ, истакна дека маратонот со секое ново издание ја потврдува својата долгогодишна традиција и значењето за градот.

„Виз Ер Скопскиот маратон е спортска традиција која со секое ново издание го обединува Скопје. Оваа година имаме рекорден број учесници и голем број тркачи од странство, што е потврда дека маратонот има свое место на меѓународната спортска мапа“, посочи Стојановиќ.

Министерот за спорт, Борко Ристовски, нагласи дека ваквите манифестации придонесуваат за промовирање на спортот и поттикнување на активното учество на граѓаните, особено на младите.

Поддршка за настанот најави и Делегацијата на Европската Унија. Заменик-шефот на Мисијата на ЕУ во Македонија, Бен Нупнау, истакна дека спортот ги поврзува луѓето без оглед на нивното потекло и границите, а Скопскиот маратон е пример за такво поврзување.

Градоначалникот на Скопје, Орце Ѓорѓиевски, потврди дека градот ќе ги стави на располагање јавните претпријатија и надлежните служби за безбедно и непречено одржување на манифестацијата. Тој ги повика скопјани да излезат на улиците и да ги бодрат учесниците.

Спортскиот директор на маратонот, Кире Синадиновски, оцени дека рекордниот број пријавени тркачи претставува голем организациски предизвик, но и дополнителна мотивација за тимот.

Посебна улога во реализацијата на настанот ќе имаат околу 500 волонтери, кои ќе бидат распоредени на различни позиции долж патеките. Секретарот на маратонот, Гордана Николовска, ја истакна нивната важност, заедно со придонесот на организаторите, институциите и партнерите.

Годинава учесниците ќе можат да избираат меѓу четири дисциплини: класичен маратон на 42,195 километри, полумаратон на 21 километар, трка на пет километри и штафетната трка „ЕУ фор Спорт“.

Покрај натпреварувачкиот дел, предвидени се и дополнителни активности за учесниците и публиката, како и поддршка долж патеките, која традиционално придонесува за атмосферата на маратонот.

На 4 октомври Скопје ќе биде домаќин на илјадници тркачи и навивачи, а рекордното учество од 15.050 натпреварувачи од 63 земји ќе биде еден од главните белези на годинешното издание.