ПРВИОТ ЧОВЕК СО БИЛИОН ДОЛАРИ Маск сега вреди повеќе од цели држави

Илон Маск стана првиот човек во историјата чие богатство надмина еден билион долари, односно илјада милијарди долари, потврдувајќи го својот статус како една од највлијателните личности во современиот бизнис и технологија.

Малкумина бизнис-лидери оставиле толку силен печат врз популарната култура како Маск. Претприемачот, кој изгради империја преку компаниите Tesla и SpaceX, успеа да стане централна фигура во интернет-културата и да создаде лојална база на следбеници, и покрај растечката критика кон ултрабогатите поединци ширум светот.

Неговото влијание се протега во повеќе индустрии – од автомобилскиот сектор и вселенските технологии до вештачката интелигенција и социјалните мрежи. Додека поддржувачите го слават неговиот директен и неконвенционален стил, критичарите предупредуваат дека располага со моќ слична на онаа на олигарсите и изразуваат загриженост поради начинот на управување со неговите компании и неговите политички активности.

Клучен момент за новиот рекорд беше јавната понуда на акции на SpaceX, која собра рекордни 75 милијарди долари и дополнително ја зголеми вредноста на компанијата. Според проценките на Forbes и Reuters, уделот на Маск во SpaceX вреди околу 866 милијарди долари, а заедно со Тесла и останатите инвестиции неговото вкупно богатство надминува 1,1 билион долари.

„Вториот најбогат човек во светот располага со околу 300 милијарди долари, што е помалку од една третина од потенцијалната вредност на богатството на Маск“, изјави Мет Дуро, заменик-уредник во Forbes Wealth.

Маск дополнително го прошири своето влијание во 2022 година кога ја купи социјалната мрежа X (поранешен Twitter) за 44 милијарди долари. Со тоа доби директен канал за комуникација со стотици милиони корисници и стана еден од најгласните коментатори на теми како политика, имиграција, државна потрошувачка и слобода на говор.

Неговото вклучување во политиката, особено преку соработката со администрацијата на американскиот претседател Доналд Трамп, предизвика бројни реакции. Во 2025 година Тесла се соочи со пад на продажбата на неколку меѓународни пазари, додека против компанијата беа организирани протести и бојкоти од потрошувачи.

Роден во Преторија, Јужна Африка, во 1971 година, Маск студирал на Универзитетот во Пенсилванија, каде што дипломирал во 1997 година. Во 2008 година ја презеде функцијата извршен директор на Тесла и одигра клучна улога во популаризацијата на електричните автомобили. Многу аналитичари сметаат дека токму успехот на Тесла ги натера традиционалните автомобилски производители сериозно да инвестираат во електричната мобилност.

Со богатство што веќе надминува еден билион долари, Маск не само што постави нов финансиски рекорд, туку и дополнително ја зацврсти позицијата како една од најмоќните и највлијателни личности на 21 век