ПАНИКА НА ПАЗАРИТЕ – Светот се тресе по новиот скок на нафтата
Ескалацијата на тензиите на Блискиот Исток предизвикува силен потрес на енергетските пазари.
Глобалниот енергетски пазар утрово бележи силен раст на цените, како резултат на нова ескалација на тензиите на Блискиот Исток. Двете главни референтни сурови нафти забележаа значителни поскапувања, што предизвика загриженост кај инвеститорите и најави можен нов бран инфлаторни притисоци.
Американската лесна нафта (WTI) порасна за над 4 проценти и достигна 96,73 долари за барел. Слично движење има и „Брент“, кој се зголеми за 3,62 проценти и моментално се тргува по цена од 105,63 долари за барел.
Како главен фактор за овој нагол скок се наведува ставот на Иран дека нема да го отвори Ормутскиот Теснец додека трае американската поморска блокада на нивните пристаништа. Со оглед на тоа што преку овој стратешки премин се транспортира значителен дел од светската нафта и гас, секое нарушување во неговото функционирање веднаш се одразува на глобалните пазари.
И покрај одредени знаци на стабилизирање по првичниот шок, пазарите остануваат крајно нестабилни, со чести промени на цените зависно од новите информации од дипломатската и безбедносната сцена.
Аналитичарите предупредуваат дека ваквата волатилност ќе продолжи сè додека трае геополитичката неизвесност. Без брза деескалација, постои ризик од подолгорочен пораст на цените на енергенсите, што дополнително би ја оптоварило глобалната економија.