ОХРИД ЗА ИЛИНДЕН РЕЧИСИ РАСПРОДАДЕН Сместувањето достигнува и до 500 евра
Концертите, езерото и празничниот викенд го полнат градот, а евтините сместувања веќе речиси исчезнаа.
Празникот Илинден традиционално го полни Охрид до последно место. Со концерти, топло езеро и продолжен празничен викенд, „македонскиот бисер“ повторно очекува голем број гости. Потрагата по сместување за двајца покажува дека евтините опции се речиси исчезнати. Најретко се наоѓаат апартмани од околу 50 евра за ноќ, додека поголемиот дел од понудите се движат од 60 до 100 евра дневно.
На платформите за резервации има и многу поскапи варијанти и дел од сместувањата за празничниот викенд достигнуваат и 500 евра за две ноќевања, без дополнителни услуги како појадок или базен.
Хотелските капацитети исто така имаат високи цени. Ноќевање за двајца во дел од хотелите се движи од околу 80 до над 250 евра, зависно од категоријата и понудата. Големиот интерес се должи и на богатата музичка програма со концерти на познати регионални изведувачи, што дополнително го зголемува интересот за охридското крајбрежје.
Угостителите очекуваат зголемен промет за празничниот период, а туристичката сезона повторно се очекува да донесе голем број домашни и странски посетители.
