НОВ ПЛАН ОД БРИСЕЛ Новите членки на ЕУ би можеле да гласаат со ограничувања

Германија, Франција, Холандија, Белгија и Луксембург предлагаат Европската Унија да разгледа воведување на привремени ограничувања на правото на глас за идните нови членки, како и дополнителни заштитни механизми за зајакнување на владеењето на правото.

Во заеднички документ, кој го видел Ројтерс, земјите предлагаат идните договори за пристапување да вклучуваат нов механизам за следење и заштитна клаузула. Таа би овозможила преземање мерки во случај на сериозни проблеми во области како демократијата и слободата на медиумите.

„ЕУ треба да отвори детална дискусија за можноста за привремени, преодни ограничувања на правото на глас за новите земји-членки, особено во делови од законодавството каде што е потребна едногласност“, се наведува во документот.

Според предлогот, ваквите мерки би се однесувале на клучни области како проширувањето, надворешната политика и буџетот на ЕУ, каде што одлуките бараат согласност од сите земји-членки.