НЕМА ГУЖВИ НА ГРАНИЦИТЕ Но опасност демне на неколку делници низ Македонија

Денеска (17.06.) сообраќајот на државните патишта низ Македонија се одвива непречено по суви коловози, информираат од АМСМ. Интензитетот на сообраќајот надвор од урбаните средини е умерен, а на граничните премини од македонска страна нема подолги задржувања за влез и излез од државата.

Од АМСМ препорачуваат прилагодена брзина на движење, почитување на сообраќајната сигнализација и зголемена внимателност, особено на патиштата низ котлини, речни долини и клисури каде е можна појава на одрони. Како покритични се посочуваат делниците Катланово – Велес, Маврово – Дебар – Струга, Виница – Берово и Кочани – Делчево.

Од 15 април патниот правец Охрид – Ресен преку Националниот парк Галичица е повторно отворен за сообраќај за сите возила до 3,5 тони.

АКТУЕЛНИ РАБОТИ НА ПАТИШТАТА:

• На автопатот А2, делница Гостивар – Стража, во тек е санација на повеќе мостови, поради што е воведен времен режим на сообраќај кој ќе остане во сила до завршување на работите.

• Од крајот на март се реализира санација на мостовите на реката Вардар кај село Желино на автопатот А2 во двата правци, Скопје – Желино и Желино – Скопје.

• На автопатот А1 „Пријателство“, на делницата Смоквица – Гевгелија, се изведуваат работи за поставување интерконективен гасовод, а сообраќајот се одвива според времен режим.

• На скопската обиколница (А2) се врши рехабилитација на дел од коловозот меѓу клучките Волково и Кондово. Левата лента е затворена, а возилата се движат по средната и десната лента.

• На регионалниот пат Косоврасти – Мелнички Мост продолжува санацијата на свлечиште, поради што е во сила времена измена на режимот на сообраќај.

• Поради изградба на Коридорот 10Д, на патниот правец Прилеп – Битола е воведен времен режим на сообраќај, при што возилата се пренасочуваат по регионалниот пат на потегот од клучка Лагово до Тополчани.