МИЦКОСКИ ГО ОТВОРИ БЛЕДСКИОТ ДОГОВОР Да се вратиме децении назад – моштите на Гоце Делчев се донесени во Скопје
Премиерот Христијан Мицкоски прашањето за преносот на посмртните останки го поврза со Бледскиот договор и потсети на пренесувањето на останките на Гоце Делчев во Скопје, оценувајќи дека тоа има значење за македонскиот идентитет.
Одговарајќи на новинарско прашање дали пренесувањето на посмртни останки може да има импликации врз односите на Македонија со Грција и Бугарија, премиерот Христијан Мицкоски рече дека прашањето треба да се разгледува низ призмата на Бледскиот договор.
Мицкоски потсети дека договорот бил постигнат по капитулацијата на Бугарија во Втората светска војна, при што ја употреби формулацијата дека тогашна Бугарија ја окупирала територијата на денешна Македонија.
„Јас тоа го коментирам во насока на Бледскиот договор којшто е постигнат веднаш после капитулацијата на фашистичка Бугарија, којашто ја има окупирано за време на Втората светска војна територијата на денешна Македонија“, изјави Мицкоски.
Тој притоа упати и критики кон политички опоненти поради начинот на кој, како што рече, го толкуваат историскиот контекст. Во однос на прашањето за пренесувањето на посмртните останки, Мицкоски се наврати на примерот со Гоце Делчев. Тој потсети дека останките на македонскиот револуционер биле пренесени во Скопје, поврзувајќи го тој чин со Бледскиот договор.
„Што се однесува до пренесувањето на моштите, јас би се вратил назад неколку децении кога моштите на македонскиот великан Делчев, како резултат на тој Бледски договор, се донесени во Скопје“, рече премиерот.
Според Мицкоски, значењето на Делчев е силно поврзано со македонскиот идентитет.
„Тоа е нешто што треба нас како Македонци да нè прави горди, затоа што моштите на тој великан, којшто бил во свое време пред времето, симболизираат многу за македонскиот идентитет“, нагласи тој.
Мицкоски изрази жалење што, според него, денес релативно малку се зборува за Бледскиот договор и за договореното во тој период. Прашањето за посмртните останки, како што произлегува од неговата изјава, тој го постави во поширок историски и политички контекст, поврзувајќи го со односите со соседните држави и со прашањата поврзани со македонскиот идентитет.
