КРАЈОТ НА СВЕТОТ ПОСТОИ Градот каде последната улица завршува со мраз, океан и пат кон Антарктикот
Ушуаја со години го носи овој неверојатен прекар – место каде завршува Јужна Америка, а започнува патувањето кон ледениот континент.
На самиот југ од Аргентина, таму каде што завршува копното и почнува бескрајниот океански простор кон Антарктикот, се наоѓа Ушуаја, градот кој со децении го носи прекарот „крајот на светот“. Опкружена со снежни планини, ледени води, острови и дивата природа на Огнена Земја, Ушуаја е место каде што патниците доаѓаат да почувствуваат дека се на последната точка на планетата.
Додека животот во Буенос Аирес се одвива во ритамот на тангото и фудбалската страст, илјадници километри јужно, во овој оддалечен град секојдневието тече под сосема поинакво небо меѓу Андите и студениот канал Бигл.
Ушуаја се наоѓа на јужниот брег на островот Тиера дел Фуего, помеѓу последните падини на Андите и каналот Бигл, воден пат кој ги поврзува Атлантскиот и Тихиот Океан. Од речиси секој дел на градот се гледаат снежни врвови, густи шуми, морето и бродови кои тргнуваат кон уште појужните предели. Токму поради својата положба, Ушуаја често се опишува како местото каде што завршуваат Патагонија, Аргентина и јужноамериканскиот континент. Нејзиниот туристички слоган „крајот на светот, почетокот на сè“ совршено ја опишува привлечноста на градот кој за многумина е симбол на авантура и истражување.
Во Ушуаја времето има свој карактер. Сонце, дожд, снег и силни ветрови можат да се сменат во само неколку часа. Шарените куќи покрај брегот создаваат впечатлив контраст со снежните планини зад нив, а дивината започнува речиси веднаш зад последните градски улици. Иако градот има хотели, ресторани, музеи, продавници и модерна инфраструктура, неговата најголема атракција останува природата – пингвините, ледениот пејзаж, каналот Бигл и близината до Антарктикот.
Ушуаја долго време се сметаше за најјужниот град на планетата, но денес титулата е предмет на географска дебата. На спротивната страна од каналот Бигл се наоѓа чилеанскиот Пуерто Вилијамс, кој по официјалното добивање статус на град во 2019 година се смета за најјужниот град во светот. Сепак, Ушуаја останува неспоредливо поголема, со меѓународен аеродром, развиен туризам и инфраструктура, па многумина ја нарекуваат „најјужниот голем град на Земјата“. За патниците таа и понатаму е главната порта кон Огнена Земја и Антарктикот.
Само неколку километри од центарот на градот тргнува една од најпознатите туристички атракции „Трен дел Фин дел Мундо“, или „Возот на крајот од светот“. Денес старите вагони и парната локомотива ги носат посетителите низ прекрасните пејзажи на Патагонија, покрај шуми и планински предели. Но, неговата историја е многу потешка. Железницата била изградена на почетокот на 20 век за потребите на затворот во Ушуаја. Затворениците со воз биле носени во шумите на планината Сузана, каде што работеле на сечење дрва и собирање материјали потребни за развојот на градот. Така, возот станал симбол на две различни приказни, една за суровото минато на Ушуаја и друга за денешната желба на луѓето да го откријат едно од најоддалечените места на планетата. Ушуаја денес не е само град на крајот од светот. Таа е место каде што завршува патот за едни, а за други започнува најголемата авантура и патувањето кон Антарктикот.
