ИНСТИТУТ ЗА СУДСКА МЕДИЦИНА – Резултатите од анализите ја појаснуваат причината за смрт
Комбинација од труење, задушување и високи температури довела до трагичниот исход.
Кај дел од жртвите од пожарот во дискотеката „Пулс“ во Кочани биле пронајдени цијаниди, алкохол, дроги и лекови во крвта, но главната причина за смртта кај најголемиот број е труење со јаглероден моноксид, покажаа обдукциските и токсиколошките анализи.
Директорот на Институтот за судска медицина, Александар Станков, на денешното рочиште истакна дека кај 59 лица смртта настапила како резултат на комбинација од фактори: труење со јаглероден моноксид, амбиентално и компресивно задушување, како и оштетување на дишните патишта од високи температури. Кај останатите четири жртви причината била тешко оштетување на белите дробови и изгореници.
Според анализите, јаглеродниот моноксид бил доминантниот причинител на смртта. Овој гас, кој се создава при пожари во затворен простор, брзо ја исполнува просторијата и го блокира транспортот на кислород во организмот. Иако кај дел од жртвите биле пронајдени и цијаниди, тие имале споредна улога и само го засилиле ефектот на труењето.
Токсиколошките испитувања покажале присуство на водороден цијанид кај 26 лица, додека кај 33 биле детектирани цијаниди во крвта. Дополнително, кај 49 жртви имало алкохол, кај 8 биле пронајдени дроги, а кај 4 лекови како седативи и антидепресиви.
Станков објасни дека ваквите случаи не можат да се анализираат преку еден фактор, бидејќи станува збор за комплексна комбинација од токсични гасови, чад и висока температура. Чадот ги затнува дишните патишта, топлиот воздух ги оштетува, а недостигот на кислород дополнително ја влошува состојбата.
Кај дел од жртвите било утврдено и компресивно задушување, што најчесто се случува при стампедо, кога доаѓа до притисок врз градниот кош и стомакот. Дополнително, амбиенталната асфикција се јавува поради намален процент на кислород во затворениот простор.
Обдукциите покажале и карактеристични знаци за труење со јаглероден моноксид, како светлоцрвена боја на крвта и промени на органите, што дополнително ја потврдува оваа причина како клучна.
Пожарот во дискотеката „Пулс“ избувна на 16 март 2025 година за време на настап, при што животот го загубија 63 лица, што го прави еден од најтрагичните настани во поновата историја на земјата.