ГОЛЕМАТА ВИСТИНА ЗА БОГАТИТЕ КОМПАНИИ Кој заработува милиони, а кој добива „минимум“
Од 3.000 до 254.796 денари покажува екстремни разлики во месечните примања.
Колку навистина плаќаат компаниите кои се наоѓаат меѓу 100-те најпрофитни фирми во земјата. Станува збор за компании со добивки од околу 3 милиони евра до над 73 милиони евра, но со значителни разлики во висината на платите.
Податоците покажуваат огромен јаз во платите и тоа од околу 3.000 денари до речиси 255.000 денари месечно.
Највисоката евидентирана просечна плата е во „Касинос Аустриа Интернационал Македонија“ ДОО Скопје, каде што единствениот вработен има месечна заработка од околу 4.000 евра. Компанијата остварила приход од 9,8 милиони евра и добивка од 8,7 милиони евра.
Високи просечни плати имаат и неколку други компании: како што се „А Плус Инжинеринг“ ДОО Скопје 160.903 денари (6 вработени), „Аксапта Мастерс“ ДОО Скопје 135.570 денари (311 вработени), „ТЕ-ТО“ АД Скопје 133.743 денари (70 вработени), „СЦМ Ретаил“ ДООЕЛ Скопје 121.659 денари (16 вработени) и „Филип Морис Тутунски Комбинат Прилеп“ ДОО Скопје 102.886 денари (48 вработени). Овие компании бележат високи приходи и значителни добивки, а во исто време исплаќаат надпросечни плати во македонски услови.
На спротивниот крај од листата се компании кои, и покрај високите профити, исплаќаат релативно ниски плати. Иако најниската евидентирана плата од 3.000 денари е во компанија со специфична сопственичка и оперативна структура, таа не е репрезентативна за реалната состојба поради фактот дека има само еден вработен.
Меѓу фирмите со ниски плати се издвојуваат „Атлантик“ 27.209 денари (26 вработени), „Машинокоп Ресурсис“ ДООЕЛ Кавадарци 29.197 денари (96 вработени), „Палма Траде“ Љумалиј ДООЕЛ Тетово 29.764 денари (15 вработени), „ИГМ-Трејд“ 31.111 денари (536 вработени), „Езимит Капитал“ ДОО Штип 31.346 денари (5 вработени). Овие компании во исто време генерираат високи приходи и милионски добивки, што отвора прашања за распределбата на профитот и политиката на плати.
Анализата укажува на јасен тренд дека дел од најпрофитните компании во земјата исплаќаат релативно ниски плати во споредба со нивните финансиски резултати, додека мал број фирми издвојуваат значително повисоки примања. Ова повторно ја отвора јавната дебата за тоа дали растот на профитот соодветно се прелева кон вработените или останува концентриран кај сопствениците и управувачките структури.
