350.000 ЕВРА ЗАД ПЛОЧКИ ВО КУЈНА, ВИДЕО СНИМКИ И ТАЈНИ СРЕДБИ – Не се чувствувам виновен, вели судијата Ристов
Во доказите се појавуваат рачно пишувани белешки и спомнување на „Здружение на судии“.
Денеска во Кривичниот суд се одржува ново рочиште во постапката против апелацискиот судија Ѓоко Ристов, кој е обвинет за свесно прикривање на имотната состојба и перење пари.
Обвинителката за гонење организиран криминал, Искра Хаџи Василева, ја започна доказната постапка против апелациониот судија Ѓоко Ристов, на кого му се става на товар кривично дело прикривање и перење пари, по наводно откривање на 350.000 евра скриени зад кујнски плочки во семејната куќа во Неготино.
Според обвинението, парите биле пронајдени по неколку претреси извршени на 17 и 18 јануари 2026 година, кога истражителите откриле 13 пакувања со вкупно 610 банкноти во апоени од 200 и 500 евра, внимателно скриени во шуплина зад ѕидот на кујната. За време на истрагата биле одземени и рачно напишани белешки со пресметки на износите, на кои се споменува и „Здружение на судии“, како и снимка од самата полициска акција.
Обвинителката пред судот презентираше и податоци од Државната комисија за спречување на корупцијата (ДКСК) за имотната состојба на Ристов и неговата сопруга, Симона Зориќ-Ристова, вработена во Државното правобранителство. Беа приложени имотни листови од 2008 и 2021 година, во кои се прикажани недвижности, возила, акции и кредити, како и податоци за семејни и деловни поврзаности.
Посебно внимание во постапката беше посветено на кредит за стан во Охрид, земен преку „Охридска банка“ и поврзан со фирмата „Алма комерц“ на Љупчо Пецов-Ѓаволот, за кого Ристов претходно одлучувал во судски постапки. Станот подоцна бил пренесен на таткото на сопругата, при што, според обвинението, биле вклучени сложени финансиски и полномошни конструкции меѓу инволвираните лица.
Во судницата беа презентирани и докази за платите на обвинетиот и неговата сопруга, како и нивно учество во управни и правни структури. Обвинителството истакна дека постојат индиции за судир на интереси и влијание врз судски одлуки.
Како дополнителен доказ беа изнесени судски одлуки од 2017 и 2021 година поврзани со Љупчо Пецов, во кои Ристов одлучувал во негова корист, како и видео-снимки од средби меѓу Ристов и поранешниот државен правобранител Фехми Стафа, вклучително и во просториите на Апелацискиот суд. Стафа претходно призна вина во поврзан случај за примање поткуп.
Одбраната побара присуство на вештакот кој ги изготвил наодите за биолошките траги и доказниот материјал, по што судот ја продолжи постапката.
Обвинетиот Ѓоко Ристов пред судот изјави дека не се чувствува виновен по обвиненијата што му се ставаат на товар.
ОДБРАНАТА ТВРДИ – Ова дело не важи за судии, заѕиданите 350.000 евра не се на судијата Ристов
