ГОЛЕМ ПАРАДОКС Платите нагоре, стандардот надолу во Црна Гора

Просечната нето плата во Црна Гора во април 2026 година изнесувала 1.029 евра, што претставува зголемување од две евра во однос на март. Сепак, и покрај овој номинален раст, реалните плати бележат пад од 1,2 проценти, како резултат на побрзиот раст на потрошувачките цени, покажуваат податоците на Монстат.

Бруто платата во истиот период изнесувала 1.229 евра, додека нето износот, по одбивање на даноци и придонеси, бил 1.029 евра.

Во споредба со претходниот месец, нето платата е зголемена за 0,2 проценти, а на годишно ниво бележи раст од два проценти. Меѓутоа, инфлацијата од 1,4 проценти на месечно ниво довела до намалување на куповната моќ и реален пад на платите.

Највисоки примања се забележани во финансискиот сектор и осигурувањето, со просек од 1.661 евро, потоа во снабдувањето со електрична енергија, гас и климатизација со 1.482 евра, како и во ИКТ секторот со 1.304 евра. Над просекот се и недвижностите, рударството, како и професионалните и научни дејности, државната администрација и здравството.

Најниски плати се регистрирани во административните и помошни услуги со 856 евра, потоа во уметноста и забавата, земјоделството, водоснабдувањето, преработувачката индустрија и образованието. Во трговијата просекот изнесува 966 евра, додека во угостителството и сместувачките услуги е околу 1.002 евра.

Податоците покажуваат дека платите пораснале во 12 сектори, додека во шест има намалување. Најголем раст е забележан во земјоделството, енергетиката и другите услужни дејности, а пад има во градежништвото, јавната администрација, дел од стручните услуги и угостителството.

Иако платите номинално продолжуваат да растат, инфлацискиот притисок го намалува реалниот стандард на граѓаните. Особено пред летната сезона, зголемените трошоци за живот дополнително влијаат врз буџетите на домаќинствата.