ГО ЧУВАЛ ВО ПЛАКАР 16 ГОДИНИ Денес вреди над 63.000 долари
Еден неотворен телефон од првата генерација на iPhone, кој со години стоел заборавен, на аукција достигна цена повеќе од 100 пати повисока од неговата оригинална вредност.
Старите мобилни телефони кои со години стојат заборавени во фиоки или плакари можеби воопшто не се безвредни. Доколку станува збор за редок модел, особено ако е целосно зачуван и никогаш не бил користен, неговата колекционерска вредност може да биде изненадувачки висока.
Најдобар пример за тоа е првата генерација на iPhone, претставена во 2007 година. Еден фабрички запечатен примерок, сопственост на Американката Карен Грин, во 2023 година беше продаден на аукција за неверојатни 63.356,40 долари.
Станувало збор за iPhone со 8 GB меморија, кој во времето на неговото појавување чинел 599 долари. Наместо да биде користен, телефонот повеќе од 15 години останал во оригиналното пакување.
Грин го добила телефонот како подарок во 2007 година, откако започнала нова работа. Но, таа веќе имала мобилен телефон, а новиот iPhone не бил компатибилен со операторот што го користела. Наместо да го отвори и да го користи, решила да го остави неотворен. Така телефонот со години останал практично недопрен. Дури подоцна, откако дознала дека неотворените примероци од првата генерација на iPhone почнале да достигнуваат високи цени, сфатила дека поседува вистинско колекционерско парче.
Аукциската куќа LCG Auctions го проценила телефонот на најмалку 50.000 долари. Сепак, наддавањето отишло значително повисоко. По 27 понуди, конечната цена достигнала 63.356,40 долари. Клучна улога одиграла состојбата на уредот и тој никогаш не бил отворен и се наоѓал во оригиналното фабричко пакување.
Првата генерација на iPhone беше претставена од Стив Џобс во јануари 2007 година, а во продажба пристигна неколку месеци подоцна. Телефонот се нудел со 4 и 8 GB меморија, имал екран на допир, камера од 2 мегапиксели и можност за интернет-пребарување – карактеристики кои во тоа време претставуваа значаен чекор во развојот на мобилната технологија. Денес, токму првите модели, особено оние кои останале фабрички запечатени, имаат посебна вредност меѓу колекционерите.
Случајот со iPhone на Карен Грин покажува дека старите електронски уреди понекогаш можат да се претворат во вредни колекционерски предмети. Моделот, реткоста, состојбата, функционалноста и особено оригиналното пакување можат значително да влијаат врз цената. Затоа, следниот пат кога ќе расчистувате стар плакар или фиока, можеби вреди прво да проверите што се крие внатре. Телефонот кој со години собира прашина можеби не е само стар уред – туку потенцијално вреден колекционерски предмет.
