ДРЖАВАТА УДРИ ПО ЗЛОУПОТРЕБИТЕ Субвенции за тутун нема за сомнителните пријави

Агенцијата за финансиска поддршка во земјоделството и руралниот развој соопшти дека досега се исплатени субвенции за 99 проценти од тутунопроизводителите за реколтата 2025 година, додека за преостанатите баратели се спроведуваат дополнителни законски проверки.

Од Агенцијата информираат дека од вкупно 15.286 баратели е извршена исплата за 15.144 лица, а средствата биле префрлени на нивните сметки на 15 јуни годинава.

Преостанатите 142 баратели не биле опфатени со првиот бран на исплати поради три причини: неплатени обврски кон државата по основ на водарина, пашарина или закуп на државно земјиште, утврдени неправилности при теренски контроли со значителни разлики меѓу пријавените и реално засеаните површини, како и сомнежи за фиктивно пријавени количини на откупен тутун кај 51 барател.

Според Агенцијата, овие случаи се доставени до Државниот инспекторат за дополнителна проверка.

Во меѓувреме, од 15 јуни досега, 73 лица ги подмириле своите долгови кон државата. За нив веќе се изготвени решенија за исплата, а средствата ќе бидат префрлени во текот на следната недела.

Од институцијата нагласуваат дека сите тутунопроизводители кои ги исполнуваат законските услови ќе ги добијат своите субвенции, веднаш по завршувањето на контролите и потврдувањето дека нема прекршувања на законот.

„Институциите нема да дозволат исплата на јавни средства врз основа на фиктивни пријави, со што би биле оштетени чесните тутунопроизводители“, наведуваат од Платежната агенција.

https://nacionalno.mk/ne-propushta-te-zem-odelci-eve-kolku-e-dobiete-za-vashiot-tutun-vo-2026/