ДИЗЕЛОТ ЛЕТНА ЗА 5,5 ДЕНАРИ Од полноќ нови цени на горивата, бензините поевтинуваат

Од полноќ на сила стапуваат новите цени на горивата, откако Регулаторната комисија за енергетика, водни услуги и услуги за управување со комунален отпад (РКЕ) денеска донесе одлука за промена на малопродажните цени.

Според одлуката, дизелот поскапува за 5,5 денари за литар, додека бензините поевтинуваат за 1,5 денари.

Така, највисоката малопродажна цена на ЕУРОСУПЕР БС-95 ќе изнесува 99 денари за литар, додека ЕУРОСУПЕР БС-98 ќе се продава за 101 денар.

Цената на ЕУРОДИЗЕЛ БС (Д-Е V) од полноќ ќе изнесува 104,5 денари за литар.

Екстра лесното масло за горење (ЕЛ-1) поевтинува за 7 денари и ќе се продава за 102,5 денари за литар.

Кај мазутот М-1 НС има зголемување од 1,835 денари за килограм, па новата малопродажна цена ќе изнесува 50,078 денари за килограм.

Од РКЕ образложуваат дека промените се должат на движењата на референтните цени на нафтените деривати на светскиот пазар.

Во споредба со претходната пресметка, референтната цена на бензините е зголемена во просек за 0,960 отсто, кај дизелот за 6,772 отсто, кај екстра лесното масло за 5,960 отсто, а кај мазутот за околу 4,084 отсто.

Дополнително, курсот на денарот во однос на американскиот долар е за околу 0,753 отсто повисок од курсот по кој биле формирани цените со претходната пресметка.