БАРСЕЛОНА ПРАВИ ПЛАН ЗА ИДНИНАТА Го мерка Артета за наследник на Ханси Флик
Артета се појави на радарот на каталонскиот гигант – тренерот на Арсенал има и посебна врска со Барселона.
Иако Ханси Флик продолжува да бележи одлични резултати со Барселона, каталонскиот гигант веќе размислува и за иднината. Едно име особено се издвојува како потенцијален наследник на германскиот стратег – Микел Артета.
Според новинарот Греам Бејли, тренерот на Арсенал е меѓу опциите кои Барселона ги следи и високо ги цени. Артета со години гради сериозен проект во Лондон, а неговата работа привлече внимание кај повеќе европски гиганти.
Шпанскиот стратег се вклопува во профилот на тренер кој традиционално го бара Барселона. Неговиот фудбал се темели на посед, организирана игра и развој на млади фудбалери, принципи кои се длабоко поврзани со филозофијата на каталонскиот клуб.
Дополнителна симболика носи и фактот што Артета како младинец бил дел од академијата на Барселона. Иако никогаш не стигнал до настап за првиот тим, неговата поврзаност со клубот би можела да биде дополнителен фактор доколку еден ден дојде до негово назначување.
Сепак, во моментов нема причина за промена на тренерската позиција. Флик е на кормилото на Барселона и според досегашната работа има целосна доверба од клубот.
Артета засега останува само како потенцијална опција за иднината, но неговото појавување на радарот на Барселона покажува дека Каталонците веќе размислуваат и за периодот по Флик.
