БАНКИТЕ УРИВААТ РЕКОРДИ 118 милиони евра само од провизии, граѓаните ја плаќаат сметката
Растот на профитите ја отвора дебатата за фер услови и заштита на корисниците.
Добивките на банкарскиот сектор во земјава продолжуваат да бележат раст, при што значаен дел од приходите и понатаму произлегува од надоместоците и провизиите што ги плаќаат граѓаните и компаниите за користење на банкарски услуги.
Според најновите податоци на Народната банка, банките во текот на 2025 година оствариле над 118 милиони евра нето-приходи од провизии и надоместоци. Во споредба со претходната година, тоа претставува зголемување од околу 3 милиони евра, односно раст од 2,7 проценти.
Во истиот период, вкупната добивка на банкарскиот сектор достигнала речиси 304 милиони евра, што е за околу 21 милион евра повеќе од 2024 година. Анализите покажуваат дека повеќе од една третина од вкупниот профит на банките доаѓа токму од наплатените провизии.
Во земјава функционираат 12 банки, а дел од нив веќе најавија измени на ценовниците и зголемување на надоместоците за одредени услуги. Овие најави предизвикаа реакции во јавноста и повторно ја отворија дебатата за оправданоста на висината на банкарските трошоци.
Гувернерот на Народната банка, Трајко Славески, оцени дека станува збор за услуги кои секојдневно ги користат и граѓаните и компаниите, поради што прашањето за нивната цена заслужува поширока јавна расправа.
Тој нагласи дека централната банка во моментов нема законски механизми за директно влијание врз одредувањето на банкарските надоместоци, но смета дека треба да се разгледа можноста за дополнување на законската рамка, по примерот на повеќе европски земји каде постојат механизми за заштита на корисниците и обезбедување фер услови за користење на платежните услуги.
На оваа тема се осврна и министерката за финансии, Гордана Димитриеска-Кочоска, која истакна дека надоместоците и провизиите на банките во моментов не се законски регулирани.
Дебатата за банкарските провизии се интензивира во период на континуиран раст на профитите на банките, додека дел од клиентите изразуваат незадоволство поради најавеното поскапување на услугите.
ГРАЃАНИТЕ НА УДАР Банки ги креваат провизиите, гувернерот Славески изненаден
