АМСМ ПРЕДУПРЕДУВА Наизменичен сообраќај на нова делница, градежни работи и пренасочувања на повеќе патишта низ Македонија
Умерен интензитет на сообраќај и без подолги задржувања на границите, но на повеќе делници се изведуваат градежни активности.

Сообраќајот на државните патишта се одвива непречено, по претежно влажни коловози, информира Автомото-сојузот на Македонија (АМСМ).
Интензитетот на сообраќај надвор од градските средини е умерен, додека на граничните премини од македонска страна нема подолги задржувања за влез и излез од државата.
Од денеска, 17 ноември, се воведува времен режим на сообраќај на регионалниот пат Р1208, на делницата Калишта – Радожда, кај местото Елен Камен. Од ДППУ „Стентон Градба“ ДОО Битола информираат дека сообраќајот ќе се одвива наизменично, по една сообраќајна лента, со двонасочно пропуштање на возилата низ една заедничка слободна лента.
АМСМ потсетува дека од 15 ноември започна законската обврска за задолжително поседување зимска опрема во возилата, без оглед на моменталните временски услови. Обврската ќе важи до 15 март 2027 година.
Од АМСМ препорачуваат возачите да ја приспособат брзината, да ја почитуваат поставената сообраќајна сигнализација и да управуваат внимателно, особено на патиштата низ котлините, речните долини и клисурите, каде што постои можност од појава на одрони. Посебно внимание се препорачува на делниците Катланово – Велес, Маврово – Дебар – Струга, Виница – Берово и Кочани – Делчево.
На повеќе патни правци низ земјата се во сила времени режими на сообраќај поради градежни активности, реконструкции и санации.
- Кичево – Охрид (А2): На делницата Пресека – Песочан до клучката Арбиново се изведуваат работи за санација на левиот коловоз. Сообраќајот се одвива под времен режим, кој ќе важи до завршување на санацијата. И на други делници од патниот правец Кичево – Охрид има градежни активности и девијации.
- Гостивар – Кичево (А2): Се изведуваат градежни работи на мостот број 63, на реката Тајмишка, поради што е воведен времен режим на сообраќај.
- Струга – Дебар (Р1201): Поради реконструкција на инекционата завеса на браната „Глобочица“, сообраќајот се одвива под времен режим до завршување на градежните активности.
- Гевгелија – граничен премин Богородица (А1): Автопатот од исклучувањето за Гевгелија до граничниот премин Богородица е затворен за сообраќај, а возилата се пренасочуваат на спротивната страна на автопатот. Во правец од Богородица кон Скопје сообраќајот се одвива двонасочно. Времен режим е воспоставен и на клучката кај Гевгелија. Оваа измена е предвидена до 15 април 2027 година.
- Граничен премин Делчево: Поради реконструкција е воведен времен режим на сообраќај, но граничниот премин функционира непрекинато.
- Штип (Р1204): Во тек е санација на мостот на реката Брегалница, при што сообраќајот се одвива под времен режим.
- Косоврасти – Мелнички Мост (Р1202): Поради санација на свлечиште е воведена времена измена на режимот на сообраќај до завршување на работите.
- Прилеп – Битола: Во рамките на изградбата на Коридорот 10Д, сообраќајот се пренасочува по регионалниот пат Прилеп – Битола, на потегот од клучката Лагово до Тополчани.
- Прилеп – Крушево – Сладуево (Р1306): Поради санација на оштетувања на патот, целосно е затворен потегот од Мало Коњари до Кривогаштани. Сообраќајот се пренасочува по алтернативна делница согласно поставената сигнализација.
- Граничен премин Блаце – Скопје: На повеќе делници се изведуваат градежни активности, а сообраќајот се одвива според воспоставен времен режим.
Патниот правец Охрид – Ресен, преку Националниот парк Галичица, е отворен за сообраќај за сите видови возила со максимална дозволена маса до 3,5 тони.
За движење низ подрачјето на Јасен важат следните временски интервали:
Скопје – Македонски Брод:
- 07:30 – 09:00 часот
- 12:00 – 12:45 часот
- 16:00 – 18:00 часот
Македонски Брод – Скопје:
- 06:00 – 07:00 часот
- 10:30 – 11:00 часот
- 13:00 – 13:45 часот
- 18:30 – 20:00 часот
АМСМ апелира до возачите да ги почитуваат сообраќајните правила и поставената сигнализација, да ја приспособат брзината на условите на патот и да поседуваат задолжителна зимска опрема.

